პოლიტიკა

ესაა იმ ტენდენციის გაგრძელება, რომელიც მიმართულია პრეზიდენტის ინსტიტუტის დასაკნინებლად - ანა ნაცვლიშვილი

პრეზიდენტის საპარლამენტო მდივანმა ანა ნაცვლიშვილმა კიდევ ერთხელ გააპროტესტა „სახელმწიფო დაცვის სპეციალური სამსახურის შესახებ“ კანონში დაგეგმილი ცვლილებების პროექტი, რომელიც დღეს პირველი მოსმენით იურიდიულ საკითხთა საპარლამენტო კომიტეტს სახელმწიფო დაცვის სამსახურის უფროსმა ანზორ ჩუბინიძემ წარუდგინა.

კანონპროექტის თანახმად, სახელმწიფო მეთაურს სახელმწიფო დაცვა სიცოცხლის ბოლომე აღარ შეუნარჩუნებდა.

ანა ნაცვლიშვილმა კომიტეტის სხდომაზე განაცხადა, რომ პრეზიდენტი კანონპროექტში წარდგენილ ცვლილებებს არ ეთანხმება, რადგან ესაა იმ ტენდენციის გაგრძელება, რომელიც მიმართულია პრეზიდენტის ინსტიტუტის დასაკნინებლად.

„ჩვენ ქვეყანაში წლების განმავლობაში ვხედავთ თანმიმდევრულ, მიზანმიმართულ და კარგად გააზრებულ საკანონმდებლო პოლიტიკას, რომელიც სახელმწიფოს მეთაურის უფლებამოსილებების შეკვეცისა და მთლიანად წაღებისაკენ არის მიმართული. ვხედავთ ნაბიჯების გადადგმას, რომ ამ მნიშვნელოვანი პოზიციის უფუნქციობას გაესვას ხაზი. ეს საკანონმდებლო ინიციატივა ზუსტად ჯდება ამ კონტექსტში. ერთ-ერთი ბოლო საკანონმდებლო ცვლილებები, რომელიც განხორციელდა, არის ის, რომ სახელმწიფოს მეთაურს სახელმწიფო ჯილდოს მინიჭების უფლებამოსილება აღარ დაუტოვეს, თუ ამაში პრემიერ-მინისტრი და პარლამენტის თავმჯდომარე არ ჩაერევა. ამ თანმიმდევრულობითა და პრინციპულობით საკანონმდებლო ორგანოს ქვეყნისთვის საჭირო საკითხებზე რომ ეზრუნა, ალბათ, ცოტა უკეთესი მდგომარეობა იქნებოდა“, - განაცხადა ნაცვლიშვილმა.

მისივე შეფასებით, არის სერიოზული საკითხები, რაც სახელმწიფო დაცვის სპეციალური სამსახურის მიერ მომზადებულ კანონპროექტში გააზრებული არ არის.

პარლამენტში წარდგენილი საკანონმდებლო ცვლილებებით, პრეზიდენტს, ასევე პრემიერ-მინისტრსა და პარლამენტის თავმჯდომარეს უფლებამოსილების ვადის ამოწურვის შემდეგ სახელწიფო დაცვა მხოლოდ ერთი წლით შეუნარჩუნდებათ. ერთი წლის გასვლის შემდეგ კი, აღნიშნულ პირებს სახელმწიფო დაცვა მთავრობის გადაწყვეტილებით გაუგრძელდებათ, თუ არსებობს საკმარისი მონაცემები, რომ მათ სიცოცხლესა და ჯანმრთელობას საფრთხე ემუქრება.