პოლიტიკა

ესაა ერთგვარი წინასაარჩევნო კამპანია, რომ გათიშოს პოლიტიკური პროცესებიდან ტელეკომპანია, რომელზეც არ ვრცელდება ამ ხელსიფულების გავლენა - ირინა სარიშვილი

პოლიტიკოსმა ირინა სარიშვილმა ტელეკომპანია „იბერიაში“ შექმნილ სიტუაციაზე საუბრისას განაცხადა, რომ ესაა ბიძინა ივანიშვილის ზეწოლა თავისუფალ მედიაზე.

„თუ მთლიანად არ დავიბრმავებთ თავებს და არ დავითხრით თვალებს, მე მგონია, ყველასთვის ნათელია, რომ ეს არც მეტი, არც ნაკლები არის შეტევა ტელეკომპანია იბერიაზე.

ჩვენ ძალიან ცოტა, თითზე ჩამოსათვლელი გვაქვს ის საინფორმაციო საშუალებები, რომლებზეც არ ვრცელდება ჩვენი ფეოდალის ძალაუფლება. ესაა ერთგვარი წინასაარჩევნო კამპანია დღევანელი ხელისუფლების საპრეზიდენტო მარათონის წინ, რომ გათიშოს პოლიტიკური თამაშიდან, პოლიტიკური პროცესებიდან ტელეკომპანია, რომელზეც, ვიმეორებ, არ ვრცელდება ამ ხელსიფულების გავლენა“, -განაცხადა სარიშვილმა.

ცნობისთვის, უკვე მეორე დღეა, ტელეკომპანია „იბერია“ საგანგებო რეჟიმში მუშაობს. გუშინ ტელეკომპანიის ჟურნალისტებმა საგანგებო განცხადება გაავრცელეს, რომელშიც აღნიშნულია, რომ ხელისუფლებამ „იბერიას“ გადაუკეტა დაფინანსების მთავარი წყარო. კერძოდ, კომპანია ,,ომეგა ჯგუფი“, რომლის შემადგენლობაშიც შედის ტელეკომპანია ,,იბერია“, პარალიზებულია. ტელეკომპანიის განცხადებით, ხელისუფლებამ წარმოება მიზანმიმართულად გააჩერა.

„ჩვენ, ჟურნალისტებს გვაქვს ინფორმაცია, რომ ეს ხდება საგანგებოდ, რომ აღარ ისმოდეს ჩვენი ეთერიდან კრიტიკული აზრი. როგორც ჩანს, ხელისუფლების მიზანია, დაიხუროს ტელეკომპანია ,,იბერია“ და ვეღარ მოვახერხოთ ჩვენი პროფესიული საქმიანობის გაგრძელება. ჩვენ გვაქვს ინფორმაცია, რომ ,,ომეგა ჯგუფზე“ ხდება ზეწოლა, რათა ხელში ჩაიგდონ „ იბერია““, - წერია განცხადებაში.