პოლიტიკა

ესაა ბიძინა ივაშვილის პირადი შურისძიება - რომან გოცირიძე „იავნანას“ საქმეზე

„ერთიანი ნაციონალური მოძრაობის“ ერთ-ერთი ლიდერის, რომან გოცირიძის შეფასებით, ფონდ იავნანას ხელმძღვანელებზე დაწყებული გამოძიება არის ბიძინა ივანიშვილის შურისძიება პაატა ბურჭულაძეზე.

„დავაკვირდებით პროცესს, ყველაფერი როგორ ხდება. ჯერ რაღაც ფილმის გადაღება, შემდეგ ანტიპიარის შექმნა, შემდეგ 20/30-ის სატელიტი ორგანიზაციის ერთ-ერთი წარმომადგენლის პროკურატურაში საბუთების შეტანა და შემდეგ მომენტალური რეაგირება პროკურატურის მხრიდან, ეს იმას ნიშნავს, რომ ეს იყო წინასწარ დაგეგმილი, რომლის ერთადერთი მიზანი არის პაატა ბურჭულაძის დისკრედიტაცია, მისი ავტორიტეტის შელახვა.

პაატა ბურჭულაძეს რომ არავინ არ დაიჭერს, ყველამ ვიცით, რაც არ უნდა იყოს იმ ფონდში, თუმცა მე არ ვიცი, რა ხდება იქ და ვერ გამოვდგები ვერავის ადვოკატად, მაგრამ ისაა ფაქტი, რომ ესაა ბიძინა ივანიშვილის პირადი შურისძიება“, -განუცხადა „ენმ“-ის ერთ-ერთმა ლიდერმა „რუსთავი 2“-ს.

შეგახსენებთ, საქართველოს მთავარ პროკურატურაში ფონდ „იავნანას“ ხელმძღვანელი პირების მიერ, სამსახურებრივი მდგომარეობის გამოყენებით, დიდი ოდენობით თანხების შესაძლო მითვისება-გაფლანგვის ფაქტზე გამოძიება დაიწყო.

„გამოძიება საქართველოს სისხლის სამართლის კოდექსის 182-ე მუხლის მეორე ნაწილის „დ“ და მესამე ნაწილის „ბ“ ქვეპუნქტებით მიმდინარეობს.

ანა მებურიშვილი