პოლიტიკა

ესაა არასერიოზულობის კიდევ ერთი გამოვლინება - გიგა ბოკერია

„ევროპული საქართველოს“ ერთ-ერთო ლიდერი გიგა ბოკერია პარლამენტის თავმჯდომარის, ირაკლი კობახიძის განცხადებას გამოეხმაურა ოპოზიცის მიერ რიგგარეშე პლენარული სხდომის პროტესტის ნიშნად დატოვების შესახებ. როგორც ბოკერიამ ტვ პირველის გადაცემა „პოლიტმეტრში“ თქვა, ბოიკოტი არ გამოხატავს იმას, რომ ოპოზიციამ ვერ გამოიყენა ხელთ არსებული ბერკეტები საკონსტიტუციო პროექტის მიღების შესაჩერებლად.

დეპუტატმა კობახიძის განცხადება არასერიოზული უწოდა.

„შედეგი გვაქვს ცუდი და უნდა ვიყოთ თვითკრიტიკულები ჩვენც, დემოკრატიული ოპოზიციაც, რომ ვერ შევძელით ამ ძალიან საზიანო პროცესის შეჩერება აქამდე. მაგრამ ეს არანაირად არ უკავშირდება სხდომის პროტესტის ნიშნად დატოვებას. ეს ჩვეულებრივი საპარლამენტო ნაბიჯია იმის სადემონსტრაციოდ, როცა ჩარჩოებს მიღმა ხდება პოლიტიკური უმსგავსობა. აქ ამაზე ლაპარაკი არაა, რა არ მოგვწონს. ოპოზიცია ვართ, ისინი უმრავლესობა და ვერ ვთანხმდებით და ეს დემოკრატიული წყობილების ნაწილია.

მაგრამ როცა ფუნდამენტური ჩარჩოებიდან გადის ვითარება, რომელიც კონსტიტუციას ეხება და ყველა საჯარო დაპირების უარყოფა ხდება, უარს გვეუბნებიან წინადადებაზე, მაგალითად, პლებისციტიზე, ის, რომ ხალხს გადაეწყვიტა. შინაარსობრივად სერიოზული საფრთხეს აყენებენ ჩვენი ქვეყნის პოლიტიკურ უსაფრთხოებას, ეკონომიკასაც და დემოკრატიულ ტრადიციას. ჩვენი აზრით, სრულიად ლეგიტიმურია მშვიდობიანი პროტესტის ის ფორმა , რომ დატოვო დარბაზი ამ სამარცხვინო პროცედურის დროს. და ეს არ მოსწონს თავმჯდომარეს? ესაა ქართული დემოკრატიის პრობლემა?

ესაა არასერიოზულობის კიდევ ერთი გამოვლინება“, -განაცხადა ბოკერიამ.

შეგახსენებთ, პარლამენტმა 26 სექტემბერს მესამე მოსმენით მიიღო ახალი კონსტიტუცია. კენჭისყრამდე დარბაზი პროტესტის ნიშნად „ევროპულმა საქართველომ“ და „ერთიანმა ნაციოანლურმა მოძრაობამ“ დატოვეს. პარლამენტის თავმდჯომარემ ეს ნაბიჯი გაქცევად შეაფასა. მისი თქმით, ოპოზიციას დიალოგისა და საკუთარ კითხვებზე პასუხის გაგების შეეშინდა.

ანა მებურიშვილი