პოლიტიკა

„ეს ყველაფერი ხდება იმისათვის, რომ რეჟიმი შეიცვალოს საქართველოში“ - „ევროპულმა საქართველომ“ და ენმ-მ საპრეზიდენტო არჩევნებთან დაკავშირებით მემორანდუმი გააფორმეს

„ევროპულმა საქართველომ“ და „ერთიანმა ნაციონალურმა მოძრაობამ“ საპრეზიდენტო არჩევნებთან დაკავშირებით, 3-პუნქტიანი მემორანდუმი გააფორმეს.

შეთანხმების თანახმად, ოპოზიციური პარტიები მხარს დაუჭერენ მეორე ტურში გასულ ერთმანეთის კანდიდატებს, ხოლო საარჩევნო კამპანიის პერიოდში თავს შეიკავებენ ურთიერთკრიტიკისგან.

პარტიები შეთანხმდნენ, რომ მხოლოდ არჩევნებია ხელისუფლების შეცვლის გზა და მაქსიმალურად მოახდენენ ამომრჩევლის მობილიზებას.

„ამ დოკუმენტში აღნიშნულია, რომ ეს ყველაფერი ხდება იმისათვის, რომ რეჟიმი შეიცვალოს საქართველოში. ამისათვის, ბუნებრივია, ყველანაირი საღი აზრიც ამას გვეუბნება, რომ საჭიროა ყველა პროდასავლურად მოაზროვნე პოლიტიკური ძალის ერთიანობა, განურჩევლად იმისა, ვის რა უთანხმოება, თუ წყენა ჰქონდა შორეულ თუ ახლო წარსულში. ეს ჩვენი მოვალეობაა, თუკი ვართ სერიოზული პოლიტიკოსები, მაქსიმალურად გადავდოთ გვერდზე ის, რაც ერთმანეთს გვაშორებს, რაც კონფლიქტურია ჩვენ შორის და წინა პლანზე წამოვწიოთ ის, რაც გვაახლოებს, იმისათვის, რომ სწორედ საქართველო გადავარჩინოთ ამ ჭირისგან , რასაც ჰქვია ივანიშვილის რეჟიმი, რომელიც, ვხედავთ, ქვეყანას შიგნიდან ჭამს“, - განაცხადა ენმ-ის პოლიტიკური საბჭოს წევრმა გიორგი ბარამიძემ.

ოპოზიციური პარტიების წარმომადგენლებმა მემორანდუმი ევროპის სახალხო პარტიის პრეზიდენტის შუამავლობით გააფორმეს.