პოლიტიკა

ეს ყრილობა არის მინიმუმ ზუსტად ისე ორგანიზებული, როგორც ჩვენი ყრილობები ადრე. აი, პასუხი ივანიშვილს - მიხეილ სააკაშვილი

საქართველოს ექს-პრეზიდენტის მიხეილ სააკაშვილის განცხადებით, ნაციონალური მოძრაობა არა მხოლოდ წარსულზე საუბარია, არამედ მომავალიცაა, რომელსაც ამ მომავლის მკაფიო ხედვა აქვს.

ამის შესახებ სააკაშვილმა სპორტის სასახლეში ყრილობაზე შეკრებილ პარტიის წევრებისა და მომხრეებისადმი მიმართვის დროს განაცხადა.

მისი თქმით, ნაციონალური მოძრაობა მუდმივად განახლებაზე და განვითარებაზე იქნება.

„ნაციონალური მოძრობა არის მოძრაობა, მხოლოდ წინ, მხოლოდ მომავლისკენ, მხოლოდ გამარჯვებისკენ, მოძრაობა შეუპოვარი და შეუჩერებელი.

ნაციონალური მოძრაობა არის თავისუფალი საქართველოს იდეა. იდეა რომელიც არ მოუხრის ქედს, როგორი ძლიერი რეგიონალური დამპყრობელი და ბოროტებაც არ უნდა გაჩნდეს. არავის, მსოფლიოს მასშტაბით. ნაციონალური მოძრაობა არის ქართული ამბიცია, განსაკუთრებული ერის ამბიცია და პრეტენზია, რომ ვიყოთ განსაკუთრებული. დიახ, ქართველი ერი არის განსაკუთრებული.მე მაქვს პირადი ამბიცია, რომ საქართველო იყოს გამორჩეული, გარშემო ყველას ჯობდეს და იყოს თითით საჩვენებელი როგორც წარმატების და მომავლის ორიენტირების ნიმუში.

ჩვენი პარტია არ არის მხოლოდ გარკვეული ელიტების პარტია. ეს არ შეიძლება იყოს პატარა ჯგუფის საკუთრება.

ყველამ დაინახა ბოლო კვირეებში და თვეებში, როგორც იდეალები არ იყოფა, ისევე არ იყოფა ნაციონალური მოძრაობა. როგორც სამშოლო არ იშლება ნაწილებად, ისევე არ იშლება ნაციონალური მოძრაობა.

ხემ რომ კარგად გაიხაროს, მას პერიოდულად სჭირდება გასხვლა და სჭირდება ძველის და უვარგისისი მოშორება, რათა ახალსა და სიცოცხლისუნარიან გაეხსნას გზა. ამიტომ, არ იზომება ჩვენი პარტია იმ ადამიანებით, რომელიც უერთდებიან და აკვდებიან მას. ჩვენი პარტია იმ დიდი პასუხისმგებლობით იზომება, იმ დიდი იდეებით, იმ დიდი ემოციებით, რომელიც არის ამ დარბაზში. მე მგონი დავინახეთ კარგად, სად დარჩა ორგანიზაციის ნიჭი, ინტელექტი და ხალასი. მე ბევრი ყრილობა მინახავს და ეს ყრილობა არის მინიმუმ ზუსტად ისე ორგანიზებული, როგორც ჩვენი ყრილობები ყველა მომენტში და იმაზე უეკთესადაც, იმიტომ, რომ ეს იყო განსაკუთრებული მომენტი, როდესაც ნაციონალური მოძრაობა აღმოჩნდა ივანიშვილის მხრიდან დარტყმის ქვეშ. ხომ დაინახეთ და ყველამ კარგად გადახედეთ სად არის ნაციონალური მოძრაობა, ორგანიზება, სად არის ნიჭი, სად არის ინტელექტი. აი, პასუხი ივანიშვილს და ყველაფერ იმას, რაც მოხდა ბოლო თვეებში.

დღევანდელ ყრილობაზე ჩვენი პარტია იწყებს ახალ ცხოვრებას, დაიმახსოვრეთ ეს თარიღი“,-აღნიშნა საქართველოს ექს-პრეზიდენტმა.

მონიკა დავლიანიძე