პოლიტიკა

ეს ხარვეზები გამოსწორდება მომდევნო წლებში - არჩილ თალაკვაძემ 1000-ლარიანი ჯარიმა უკვე გადაიხადა

საპარლამენტო უმრავლესობის წევრის, არჩილ თალაკვაძის ინფორმაციით, მან ქონებრივ დეკლარაციაში აღმოჩენილი ხარვეზის გამო დაკისრებული 1000-ლარიანი ჯარიმა უკვე გადაიხადა.

თალაკვაძემ ასევე განმარტა, რომ ძირითადი ხარვეზები ეხება დეკლარაციაში არასწორად მითითებულ შემოსავლებს, საცხოვრებელ ბინებსა და მათზე მიმაგრებულ მიწის ნაკვეთებს.

„ეს, მაგალითად, არის უძრავ ქონებასთან მიმართებაში. შესაძლოა, შეუსაბამობაა კვადრატულ მეტრთან დაკავშირებით, ან განსხვავებაა შემოსავლებში – 100, 200 ან 700 ლარის ოდენობით. ხარვეზია, როდესაც მითითებულია საცხოვრებელი ბინები და გამორჩენილია მათზე მიმაგრებული მიწის ნაკვეთები. ეს ხარვეზები გამოსწორდება მომდევნო წლებში. ჩვენ მივეცით მაგალითი ყველას, რომ საჯარო სამსახურის გამჭვირვალობა და ანგარიშვალდებულება ეს სტანდარტია, რომელიც ჩვენი მმართველობის სტილს შეესაბამება“, -უთხრა დეპუტატმა პირველ არხს.

უმრავლესობის წევრის თქმით, საჯარო სამსახურის რეფორმა მოქმედი სახელისუფლებო გუნდის პირობებში გახდა პრიორიტეტული.

თალაკვაძემ აღნიშნა, რომ დაკისრებული ჯარიმები მისმა კოლეგებმაც გადაიხადეს და ის თანხა ბიუჯეტში შევიდა.

საჯარო სამსახურის ბიურომ ქონებრივ დეკლარაციაში აღმოჩენილი ხარვეზის გამო თავდაცვის მინისტრი ლევან იზორია 1000 ლარით დააჯარიმა. გარდა ამისა დაჯარიმებულთა სიაში მოხვდნენ შინაგან საქმეთა მინისტრის ყოფილი მოადგილე, სასაზღვრო პოლიციის ყოფილი ხელმძღვანელი ზურაბ გამეზარდაშვილი; 112-ის დირექტორი გიორგი ბიჭაშვილი; კულტურის მინისტრის მოადგილე მანანა ბერიკაშვილი; პრეზიდენტის მრჩეველი ფიქრია ჩიხრაძე; სემეკ-ის წევრი გოჩა შონია; ყოფილი გენერალური აუდიტორი ლაშა თორდია; საკრებულოს წევრი გიორგი მუსხელიშვილი; სააპელაციო სასამართლოს მოსამართლე თამარ ზამბახიძე და საქალაქო სასამართლოს ყოფილი მოსამართლე თამაზ ურთმელიძე.