პოლიტიკა

ეს ფული გაიცა ფიზიკური პირების მომსახურების სექციიდან, ფაქტობრივად დახურულ ბანკში.. ლევან ყიფიანი „აგვარებდა“ ამ საქმეს - გიორგი ქურდაძე

„სანამ გაირკვეოდა, რომ თანხა უნდა გაცემულიყო და ხდებოდა კანონის დარღვევა, ხდებოდა გარკვევა, თუ ვის უნდა აეღო თავის თავზე, მაშინ ყიფიანს მოუწია 5-6 საათი ჩვენთან ერთად ყოფნა და ის „აგვარებდა“ ამ საქმეს“, - ამის შესახებ გადაცემაში „360 გრადუსი“ კომპანია „ომეგა 2"-ის დირექტორმა, გიორგი ქურდაძემ ისაუბრა. მისი თქმით, თანხის გამოტანა ფაქტობრივად დახურულ ბანკში, არასამუშაო დროს მოხდა და ამ ყველაფერს სპორტისა და ახალგაზრდობის ყოფილი მინისტრი, ლევან ყიფიანი აგვარებდა.

ქურდაძემ აღნიშნა, რომ პირველ დღეს ყიფიანს მათთან ერთად ყოფნა ბანკის შენობაში 5-6 საათი მოუწია, ვინაიდან ირღვეოდა კანონი და თანხის გამოტანის პროცესი აირია.

„პირველ დღეს მივედით დაახლოებით 14:00 საათზე, მეორე დღეს, როდესაც თანხის ნაწილი გამოვიტანეთ, 781 000 დოლარი, 40 წუთში გამოვიტანეთ ის თანხა. პირველ დღეს, სანამ გაირკვეოდა, რომ თანხა უნდა გაცემულიყო და ხდებოდა კანონის დარღვევა, ხდებოდა გარკვევა, თუ ვის უნდა აეღო თავის თავზე, მაშინ ყიფიანს მოუწია 5-6 საათი ჩვენთან ერთად ყოფნა და ის „აგვარებდა“ ამ საქმეს, რეკავდა, ამბობდა, რომ ჩვენი წასვლა იქიდან არ შეიძლებოდა და როდესაც 18:00 საათი გახდა, ვუთხარით, რომ აღარაფერი მუშაობდა, აღარც სალარო, აღარც ოპერატორები და ვერავინ ვეღარ მოგვცემდა ფულს - არა, მოიცადეთ! საბოლოოდ ეს ფული გაიცა ფიზიკური პირების მომსახურების სექციიდან, ფაქტობრივად დახურულ ბანკში“, - განაცხადა ქურდაძემ.