პოლიტიკა

ეს არის „ქართული ოცნების“ კონსტიტუცია, ეს არ არის საქართველოს კონსტიტუცია - ადა მარშანია

„პატრიოტთა ალიანსის“ წევრის, ადა მარშანიას შეფასებით, ახალი კონსტიტუცია არ არის საზოგადოებრივი შეთანხმების დოკუმენტი და ამყარებს ერთპარტიულ დიქტატურას. ამის შესახებ დეპუტატმა კენჭისყრის ჩატარებამდე განაცხადა.

„კანონმდებლებო, მინდა შეგახსენოთ კანონის განმარტება, იურისტები რომ იტყვიან, დეფინიცია. კანონი არის საზოგადოებრივი შეთანხმება. არ არის ეს კონსტიტუცია, რომელსაც ჩვენ მივიღებთ, საზოგადოებრივი შეთანხმების საბუთი, არ არის.

მე ყველა სიტყვას, რომელსაც ახლა ვიტყვი, უდიდესი გულისტკივილით ვიტყვი. ეს არის საკონსტიტუციო უზურპაცია, ერთპარტიული დიქტატურის გაფორმება-დამყარება, ესაა „ქართული ოცნების“ პარლამენტი, ეს არაა საქართველოს პარლამენტი.

ეს არის „ქართული ოცნების“ კონსტიტუცია, ეს არ არის საქართველოს კონსტიტუცია. როდემდე უნდა ვიაროთ მოჯადოებულ 25-წლიან წრეში?“-განაცხადა მარშანიამ.

შეგახსენებთ, საქართველოს პარლამენტმა მესამე მოსმენით მიიღო საკონსტიტუციო ცვლილებათა კანონპროექტი. კენჭისყრის შედეგად, 117 დეპუტატმა დოკუმენტს მხარი დაუჭირა, ხოლო 2-მა პარლამენტარმა კანონპროექტის წინააღმდეგ მისცა ხმა.

პარლამენტის რიგგარეშე პლენარული სხდომა დღეს 2 საათზე დაიწყო. განხილვის პროცესში დარბაზი პროტესტის ნიშნად დატოვეს „ევროპულმა საქართველომ“ და „ნაციონალურმა მოძრაობამ“.

ანა მებურიშვილი