პოლიტიკა

ეს არის მესამე სექტორის მიერ პროტესტის გამოხატვის თავისუფლება - ნინო გვენეტაძე საიასა და „საერთაშორისო გამჭვირვალობა-საქართველოს“ პროტესტზე

საქართველოს უზენაესი სასამართლოს თავმჯდომარე ნინო გვენეტაძე არასამთავრობო ორგანიზაციების პროტესტს გამოეხმაურა. გვენეტაძის თქმით, სასამართლო სისტემაში არსებული ხარვეზების გამოსასწორებლად დროა საჭირო.

„მიგვაჩნია და მესმის ის, რომ პრობლემები ნამდვილად გაგვაჩნია, მაგრამ პრობლემების დაძლევას სჭირდება დრო, სჭირდება გარკვეული გონივრული მიდგომები და თანმიმდევრული სვლა იმიტომ, რომ მთლიანად სასამართლო ხელისუფლება იყოს მშვიდ ვითარებაში, ჰქონდეს მუშაობის ნორმალური პირობები და სამართალწარმოება ხორციელდებოდეს ისე, როგორც სამართლიანი და კანონიერი გადაწყვეტილების მისაღებად იქნება საჭირო“, - განაცხადა გვენეტაძემ.

„საქართველო ახალგაზრდა იურისტთა ასოციაციისა“ და „საერთაშორისო გამჭვირვალობა-საქართველოს“ გადაწყვეტილება, არ წარადგინონ იუსტიციის უმაღლესი საბჭოს მონიტორინგის შედეგები, გვენეტაძემ შეაფასა პროტესტის გამოხატვის თავისუფლებად.

გვენეტაძემ აღნიშნა, რომ მზადაა, გააგრძელოს თანამშრომლობა არასამთავრობო სექტორთან.

„ეს არის მესამე სექტორის მიერ პროტესტის გამოხატვის თავისუფლება. მზად ვარ კონსტრუქციული დიალოგისთვის",- თქვა გვენეტაძემ.

შეგახსენებთ, ანა ნაცვლიშვილის განცხადებით, ანგარიშის წარდგენის უარის მიზეზია სასამართლო სისტემაში შექმნილი მძიმე ვითარებაა. მან აღნიშნა, რომ სასამართლო რეფორმა არასწორად ვითარდება, ხოლო სააპელაციო სასამართლოს თავმჯდომარედ მიხეილ ჩინჩალაძის დანიშვნით ნათლად გამოჩნდა, ვის უჭერს მხარს ხელისუფლება.

ანა მებურიშვილი