პოლიტიკა

ეს არის გუნდი, რომელიც დამსახურებულად მოიპოვებს პარლამენტის ნდობას - მამუკა ბახტაძე

დარწმუნებული ვარ, რომ ეს არის გუნდი, რომელიც დამსახურებულად მოიპოვებს პარლამენტის ნდობას, იქნება ქვეყნისა და ხალხის ინტერესების გამტარებელი, – განაცხადა პრემიერ-მინისტრმა, მამუკა ბახტაძემ, რომელმაც დღეს მთავრობის განახლებული შემადგენლობა დაასახელა.

მისი თქმით, აღნიშნული გუნდი დაამკვიდრებს თანამედროვე მართვის მაღალ სტანდარტს ქვეყანაში, რომელიც ნაკლებად ბიუროკრატიული, ეფექტიანი, მოქნილი და თანამდროვე მცირე მთავრობის კონცეფციაზე მორგებული იქნება.

ამასთან, პრემიერმა გაწეული სამსახურისთვის მადლობა გადაუხადა მინისტრთა კაბინეტის ყოფილ წევრებს.

პრემიერ-მინისტრმა მთავრობის შემადგენლობაში დღეს სამი ახალი სახე წარადგინა. განათლების, მეცნიერების, კულტურისა და სპორტის მინისტრად – მიხეილ ბატიაშვილი; ეკონომიკისა და მდგრადი განვითარების მინისტრად – გიორგი ქობულია და ფინანსთა მინისტრად – ივანე მაჭავარიანი. ამასთან მისი თქმით, დავით ზალკალიანი რჩება საგარეო საქმეთა მინისტრად, ხოლო სასჯელაღსრულებისა და პრობაციის ყოფილი მინისტრი კახა კახიშვილი მთავრობის ადმინისტრაციის ხელმძღვანელად ინიშნება.