პოლიტიკა

ეს არის ერთი დიდი უნიჭო აბსურდი - კახა კალაძე „ომეგას“ საქმეზე

თბილისის მერმა კახა კალაძემ „ომეგა ჯგუფის“ საქმეს „აბსურდი“ უწოდა და განაცხადა, რომ ამ საკითხზე გამოქვეყნებულ აუდიოჩანაწერებთან დაკავშირებით ხალხის გამოკითხვის საფუძველს ვერ ხედავს. ასე უპასუხა დედაქალაქის თავმა შეკითხვას, შესაძლოა თუ არა ჩანაწერებთან დაკავშირებით ყოფილი პრემიერ-მინისტრის, ბიძინა ივანიშვილის გამოკითხვაზე დაბარება.

„დამფუძნებლის მხრიდან რა ინტერვიუც მოვისმინეთ „ნაციონალური მოძრაობის" პარტიულ ტელევიზიაში, იქაც ვერავინ ვერაფერი ვერ გაიგო.

არანაირი სკანდალური ჩანაწერები არ მოუსმენია საზოგადოებას. თქვენ გაქვთ მცდელობა, ეს სკანდალად წარმოუდგინოთ საზოგადოებას, თუმცა ეს სკანდალი არ არის. გაურკვეველი ადამიანები საუბრობენ გაურკვეველ თემებზე. დამფუძნებლის მხრიდან რა ინტერვიუც მოვისმინეთ „ნაციონალური მოძრაობის" პარტიულ ტელევიზიაში, იქაც ვერავინ ვერაფერი ვერ გაიგო; ქალბატონი კვესიტაძე და ბატონი გვარამია კი ცდილობდნენ, რომ რაღაც ინტერპრეტაცია მოეხდინათ იმ პიროვნების საუბრის, მაგრამ საზოგადოებამ მაინც ვერაფერი ვერ გაიგო. ამავდროულად გამოქვეყნდა ექსპერტიზის დასკვნები, რომ ჩანაწრები მიჭრილ-მოჭრილი და შეთითხნილია. ეს ვისი ხელწერაა, ძალიან კარგად ვიცით. ვერ გამოდიან იმ წარსულიდან და ისევ იმ ჭაობში არიან ჩარჩენილები.

მე საფუძველს ვერ ვხედავ ადამიანების გამოკითხვის ამასთან დაკავშირებით. ეს არის ერთი დიდი უნიჭო აბსურდი, რომელიც არ ვიცი, ვინ გააკეთა, ვისი თანამონაწილეობით დაიდგა, მაგრამ ცხადია, ავთენტურობა, ჩანაწერებთან დაკავშირებული კვლევები, რომელიც სამხარაულის ექსპერტიზის ბიურომ და ასევე ლონდონში ერთ-ერთმა ცნობილმა საექსპერტო ბიურომ წარმოადგინა, ეს არის ამ ყველაფრის შედეგი",- განაცხადა კალაძემ.