სამართალი

ეს არ იყო მოტყუება, ეს იყო რეკეტი. არ ვენდობით თბილისის პროკურატურას - „იბერიას“ საინფორმაციო სამსახურის ხელმძღვანელი

ტელეკომპანია „იბერიის“ საინფორმაციო სამსახურის ხელმძღვანელმა ვახო ხუზმიაშვილმა უნდობლობა გამოუცხადა თბილისის პროკურატურის მიერ ტელეკომპანიასთან დაკავშირებულ აუდიოჩანაწერებზე დაწყებულ გამოძიებას. მისი განმარტებით, საეჭვოა, რომ უწყების განცხადებაში საუბარია მოტყუებაზე და არა გამოძალვაზე.

„ესაა პროკურატურის მხრიდან დაცინვა. გამოძიება დაუწყია თბილისი პროკურატურას. რატომ არაა იმ სიმძიმის დანაშაული, რომ მთავარმა პროკურატურამ დაიწყოს საქმის გამოძიება? მეორე, არაფერი არაა ნახსენები ტელეკომპანია „იბერიაზე“. პირველ ჩანაწერში საუბარი იყო იმაზე, რომ ტელეკომპანია „იბერიის“ წაღება უნდოდათ. ამ განცხადებაში ჩვენ ვერსად ვერ ვნახეთ, რომ პროკურატურას აინტერესებს, ვის სურდა ტელეკომპანია „იბერიას“ გადაფორმება. მეორე, გამოძიება დაწყებულია იმ მუხლითა და იმ მოთხოვნით, რაც გუშინ გაავრცელა განცხადება ბატონმა მამაცაშვილმა. აქ იყო რეკეტი, არა მოტყუება. სად არის გამოძალვა აქ ნახსენები საერთოდ? ამიტომ ჩვენ არ ვენდობით თბილისის პროკურატურას“, -თქვა ხუზმიაშვილმა.

საქართველოს მთავარი პროკურატურის ინფორმაციით, უწყებამ მედიაში გასულ აუდიოჩანაწერთან დაკავშირებით შესაძლო თაღლითობის ჩადენის ფაქტზე გამოძიება დაიწყო. საუბარია ტელეკომპანია ,,იბერიასთან“ დაკავშირებით გასაჯაროვებულ სკანდალურ ჩანაწერზე, რომელშიც მინისტრთა კაბინეტის ყოფილი წევრი, ლევან ყიფიანი ფიგურირებს.