სამართალი

ერთხელ უკვე მამა გიორგიმ ყველა კითხვაზე გასცა ამომწურავი პასუხი - მიხეილ რამიშვილი

მამა გიორგი მამალაძე მზად არის ყველა კითხვას ამომწურავად გასცეს პასუხი, - განუცხადა ჟურნალისტებს ე.წ. მატროსოვის ციხეში შესვლამდე დაკავებული დეკანოზის ადვოკატმა მიხეილ რამიშვილმა.

ადვოკატის მტკიცებით, დეკანოზს ციანიდი საერთოდ არ შეუძენია.

„დასვან რამდენი კითხვაც უნდათ, მაგრამ ერთხელ უკვე მამა გიორგიმ ყველა კითხვაზე გასცა ამომწურავი პასუხი. დანარჩენი საზოგადოებრივი, ცხოვრებისეული თუ ექნებათ, დასვან და ვისაუბრებთ“, - განაცხადა მიხეილ რამიშვილმა.

რაც შეეხება დეკანოზის სახლის ჩხრეკისას ამოღებულ იარაღს, ადვოკატის ინფორმაციით, საქმის მოწმე ირაკლი მამალაძე თავისი მეგობრების მოწმედ დაყენებას აპირებს, რომ იარაღი მისი არ არის, რასაც დაკავებული დეკანოზი ამტკიცებს.

თავის მხრივ, როგორც ადვოკატმა გიორგი ფანცულაიამ აღნიშნა, პირველი ჩვენება 33-გვერდიანი იყო და გაუგებარია, დამატებით რა შეკითხვები შეიძლება ჰქონდეს გამოძიებას.

„რაც მის საქმესთან შემხებლობაში იქნება, გასცემს პასუხებს. პროკურატურის ამოცანა თუ ის იქნება, რომ 90-იან წლებში ჩადენილი დანაშაულები მამა გიორგის დახმარებით გახსნან, ის ფიზიკურად ვერ უპასუხებს“, - განაცხადა გიორგი ფანცულაიამ.

ნინო ექვთიმიშვილი