პოლიტიკა

ერთი რამ რაც ნათელია NDI-ის კვლევიდან - იქნება მეორე ტური - ალექსანდრე ელისაშვილი

თბილისის მერობის დამოუკიდებელი კანდიდატი ალექსანდრე ელისაშვილი NDI-ის კვლევას გამოეხმაურა, რომელიც თბილისის მერობის კანდიდატების რეიტინგს ასახავდა.

ელისაშვილმა გამოკითხულთა ხმების 19% მიიღო. მისი შეფასებით, ოპოზიციონერი კანდიდატების მიერ მიღებული პროცენტები ჯამში მეტია მმართველი გუნდის კანდიდატის შედეგებზე, რაც იმაზე მიუთითებს, რომ თბილისის მერის არჩევნებზე მეორე ტური დაინიშნება.

ელისაშვილის თქმით, „ქართული ოცნების“ კანდიდატის კახა კალაძის 30%-იანი მხარდაჭერა იმაზე მიანიშნებს, რომ მმართველი გუნდი ხალხს დაშორდა.

„რას ნიშნავს ამ კვლევის შედეგები - 1. კვლევა ჩატარდა მაშინ, როდესაც მხოლოდ ჩემი კამპანია არ იყო დაწყებული, რადგან ოფიციალურად კანდიდატურაც არ მქონდა გაცხადებული - შესაბამისად მე-2 ადგილი არ არის ცუდი დასაწყისი 2. ეს შედეგი, ბუნებრივია, არ არის საკმარისი და მე არჩევნებში მხოლოდ მონაწილეობისთვის არ ვირჯები, არამედ იმისათვის, რომ ხალხის დახმარებით გავიმარჯვოთ და თბილისელების პრობლემების მოგვარებას შეუდგეთ. 3. ერთი რამ, რაც ნათელია ამ კვლევიდან - იქნება მეორე ტური. 4. ოპოზიციური ხმები ჯამში გაცილებით მეტია, ვიდრე ხელისუფლების. ეს აჩვენებს, რამდენად დაშორდა ხელისუფლება ხალხს და რამდენად წარმოდგენა არ აქვთ, რა უჭირთ უბრალო თბილისელებს და რა პრობლემებით ცხოვრობენ. სულ რაღაც რამდენიმე წლის თავზე ხალხმა აჩვენა, რომ მათ მობეზრდათ უპატრონოდ მიგდებული ქალაქისა და ქვეყნის ყურება. ახლა მთავარია, რომ თითოეულმა თბილისელმა ბოლომდე ირწმუნოს, რომ ჩვენ შეგვიძლია გარდავტეხოთ და შევცვალოთ ვითარება. ეს ყველაფერი დამოკიდებულია მხოლოდ ხალხზე“, - დაწერა ელისაშვილმა ფეისბუკის საკუთარ გვერდზე.

NDI-ის კვლევის თანახმად, ხვალ რომ თბილისის მერის არჩევნები ტარდებოდეს, გამოკითხულთა 30% კახი კალაძეს მისცემდა ხმას, 19% - ალეკო ელისაშვილს, 18% - ზაალ უდუმაშვილს, 5% - ელენე ხოშტარიას.

გამოკითხულთა 12%-მა კითხვაზე პასუხი არ იცის, 4%-მა პასუხზე უარი განაცხადა, ასევე 4%-ის თქმით, არც ერთ კანდიდატს არ მისცემდა ხმას.

ელისაშვილის წარდგენა თბილისის მეორიბის კანდიდატად 11 ივლისს მოხდა, ხოლო NDI-ის კვლევის საველე სამუშაოები 2017 წლის 18 ივნისი-9 ივლისის პერიოდში ჩატარდა.

ანა მებურიშვილი