პოლიტიკა

ერთდროულად აპელირებდე სისხლიანი 9 წლით და ამავე დროს ამ კოშმარების განმახორციელებლებს აწინაურებდე, ეს მოქალაქეში გაურკვევლობას აღძრავს - პრეზიდენტი

საქართველოს პრეზიდენტის, გიორგი მარგველაშვილის განცხადებით, მოქალაქეებში გაურკვევლობას აღძრავს მმართველი გუნდის პოზიცია „ნაციონალური მოძრაობის“ დროინდელი მთავრობის მიმართ, რომლითაც ერთდროულად ხდება აპელირება 9 წელზე და პარალელურად ხდება მაშინდელი რეჟიმის „განმახორციელებლების დაწინაურება“.

„მე მოველოდი, რომ ჩვენი პოლიტიკური ჯგუფი, რომელმაც შევცვალეთ „ნაციონალური მოძრაობის“ ხშირ შემთხვევაში ძალადობრივი ქმედებები, პროცესს გავხდიდით საჩვენებელს, არა როგორც ერთი ადამიანის მეორეზე ძალადობით, არამედ იმ კუთხით, თუ როგორ შეიძლება სახელმწიფომ და საზოგადოებამ გადაიტანოს თავისი ტკივილი და შექმნას უკეთესი პრეცედენტი.

იყო იდეები და მოსაზრებები, რომელიც მოდიოდა არა მხოლოდ „ქართული ოცნებიდან“, არამედ საზოგადოებიდან თუ როგორ უნდა, წავსულიყავით წინ. სამწუხაროდ, წინ წასვლა არცერთი კონცეფციით არ მომხდარა.

მოხდა ის, რომ ჩვენ ეს ტკივილი და ტრაგედიები გაურკვეველი ფორმით დავაკონსერვეთ. ეს შემაშფოთებელია. თუმცა, ამაზე უფრო შემაშფოთებელია, რომ როდესაც 6 წლის განმავლობაში პოლიტიკურად ეს თემა არის აწეული მაღალ ტემპერატურაზე, მუდმივად გვესმის რომ „ნაციონალური მოძრაობა“ არის ის დიდი ბოროტება, რომელიც ჩვენ ისტორიაში დავტოვეთ და ამავე დროს ამ „ნაციონალური მოძრაობის“ ბოროტებების ჩამდენები კარიერულ წინსვლას განიცდიან. ეს ხდება ერთდროულად. ისტორიას ბევრი კაზუსი ახსოვს, მაგრამ ერთდროულად შენ ამბობდე და აპელირებდე სისხლიან 9 წელზე და საუბრობდე იმ კოშმარებზე, რაც ხდებოდა და ამავე დროს ამ კოშმარების განმახორციელებლებს აწინაურებდე, ეს ის ემოციაა, რომელიც მოქალაქეში გაურკვევლობას აღძრავს", - განაცხადა პრეზიდენტმა ადვოკატთა ასოციაციის მიერ ორგანიზებულ ღონისძიებაზე სიტყვით გამოსვლისას.

გიორგი მარგველაშვილმა აღნიშნა, რომ პირადად ის არავის დევნის მომხრე არ არის, თუმცა საჭიროა ეს დისონანსი დასრულდეს.

„ამაზე უკეთესი ყველაფერი იქნებოდა. ამაზე უკეთესი მათი დევნაც იქნებოდა და ამ თემის დავიწყებაც. მაგრამ ერთდროულად ამდენი წლის განმავლობაში მათზე მივუთითებთ და ამავე დროს მათ ვაწინაურებთ, ამავე დროს რამდენიმე პლეადა შეიცვალა და ახლა უკვე ადეიშვილი-კეზერაშვილის ერთგული თანამშრომლები პოლიტიკური ტრიბუნებიდან თითს უქნევენ და აშინებენ საზოგადოებას, რაც იყო „ნაციონალური მოძრაობის“ დროს. ეს დისონანსი უნდა იყოს გადაძლეული. მე არასდროს არ ვყოფილვარ რაიმე სახის დევნის მომხრე. მაგრამ ასეთი პოლიტიკური დისონანსის შექმნა, ჩემთვის გაუგებარია, თუ რას ვემსახურებით ამ შემთხვევაში", - განაცხადა პრეზიდენტმა.