პოლიტიკა

ერთადერთი გამოსავალი არის ახალი ხელისუფლების ყოლა- ირაკლი აბესაძე

ფრაქცია „ევროპული საქართველოს“ ერთ-ერთი წევრის, ირაკლი აბესაძის განცხადებით, ვადამდელ საპარლამენტო არჩევნებს წინ უნდა უძღოდეს ცვლილებები საარჩევნო სისტემაში.

მისივე განმარტებით, პროპორციული წესით არჩეული ხელისუფლება იქნება ამომრჩევლის ნების გამომხატველი.

„ერთადერთი გამოსავალი იმ ცვლილებებისა და რეფორმებისათვის, რომლის რეალური მოლოდინი და საჭიროება არსებობს ქვეყანაში, არის ახალი ხელისუფლების ყოლა.

ასეთი შეიძლება მივიღოთ მხოლოდ და მხოლოდ პროპორციული წესით ჩატარებული არჩევნების შედეგად, რაც ნაკლებ შანსს უტოვებს ხელისუფლებას, მოახდინოს საარჩევნო კანონმდებლობით მანიპულირება, დაამახინჯოს ამომრჩევლის ნება და, ფაქტობრივად, მიიტაცოს ხელისუფლება ისე, რომ მას ამომრჩევლის რეალური მხარდაჭერა არ ჰქონდეს. თუკი ისინი უყურებენ ფორმალურად მეორე ტურში მიღებულ ციფრებს, მათ უმჯობესია, შეხედონ რეალურად მოსახლეობის სოციალურ მდგომარეობას“,- განაცხადა დეპუტატმა.

ცნობისთვის, გაერთიანებულმა ოპოზიციამ ხელისუფლებას ულტიმატუმი წაუყენა, რომელიც საპრეზიდენტო არჩევნების შედეგების გაუქმებას, საარჩევნო სისტემაში ცვლილებასა და ვადამდელი საპარლამენტო არჩევნების ჩატარებას მოიცავს. გაერთიანებულმა ოპოზიციამ ხელისუფლებას საკუთარი მოთხოვნების განსახილველად ვადა 16 დეკემბრამდე მისცა.