სამართალი

,,ეროვნული ფორუმის’’ წევრი - შს მინისტრის მოადგილეს: მანიაკ და მოძალადე გალდავას რომ ხელს დააფარებთ, თქვენც უნდა აგოთ პასუხი

საკრებულოს ,,ეროვნული ფორუმის’’ თავმჯდომარე, ავთანდილ დავითაძე სპეციალურ მიმართვას ავრცელებს, სადაც შს მინისტრის მოადგილეს შალვა ხუციშვილს ახსენებს თავის უფლებამოვალეობას და მიუთითებს, რომ ნუ გახდება პოლიციელი გალდავას მიერ ჩადენილი დანაშაულის თანამონაწილე.

საქმე ეხება ორი დღის წინ დავითაძის მიერ გავრცელებულ ინფორმაციას, რომ გვიან ღამით მისი შვილი გიორგი დავითაძე ვაკე-საბურთალოს პოლიციის უფროსმა სცემა.

ეროვნული ფორუმის წევრის განცხადებით, მისი შვილი ვაკე-საბურთალოს პოლიციაში მივიდა, რადგან მისი მეგობრები იქ ჰყავდათ გადაყვანილი. მისივე თქმით, პოლიციის უფროსმა გიორგი გალდავამ, გიორგი დავითაძე თავად შეიყვანა პოლიციის შენობაში, საიდანაც ის ნაცემი გამოვიდა.

„ბატონო ხუციშვილო, მოგმართავთ პირადად თქვენ, რომელმაც სცადეთ და ხელი დააფარეთ ვაკე-საბურთალოს პოლიციის სამმართველოს პოლიციელს ავთანდილ გალდავას. ჩემი შვილი, გიორგი დავითაძე კი მოიხსენიეთ რომ არის ყაჩაღი. კარგი ხელმძღვანელი გალდავას მიერ ჩადენილ საქმეს შეისწავლიდა, ანალიზს გაუკეთებდა და შესაბამის ღონისძიებას გაატარებდა. თქვენ, სახელმწიფო იმისთვის კი არ გიხდით ხელფასს, რომ შეფუთოთ ისე როგორც თქვენ გაწყობთ, თქვენი თანამშრომლების შავ-ბნელი საქმეები, არამედ იმისთვის რომ დაიცვათ სამართლიანობა. ასეთი საპასუხისმგებლო თანამდებობის პირი ხართ და მანიაკ და მოძალადე გალდავას, რომ ხელს დააფარებთ ამ დანაშაულის დაფარვისთვის თქვენც უნდა აგოთ პასუხი.

მე გუშინ ოფიციალურად მივმართე შს სამინისტროს საქვეუწყებო სამსახურს, მოეცათ ცნობა ჩემი შვილის ადრე ნასამართლეობის შესახებ, სადაც ყაჩაღობის მუხლი არსად არ უფიქსირდება. გადავიხადე ფული, მივედი დღეს და განმიმარტეს რომ თურმე ტექნიკური მიზეზების გამო ვერ გასცემდნენ მსგავს ცნობას.
ვერ გასცეს იმიტომ რომ თქვენ მოიტყუეთ და მოატყუეთ საზოგადოება, როდესაც განაცხადეთ რომ თითქოს გიორგი დავითაძე ადრე ნასამართლევია ყაჩაღობის მუხლით.

მივმართავ სახალხო დამცველს, შემხვდეს, მოისმინოს ჩემი განმარტება. გაეცნოს საქმის მასალებს და მიიღოს გადამწყვეტი ზომები. თუ არადა მე გაჩერებას არ ვაპირებ. ავთანდილ გალდავა მინიმუმ უნდა გათავისუფლდეს დაკავებული თანამდებობიდან და ბატონმა ხუციშვილმა ბოდიში მოიხადოს საზოგადოების შეცდომაში შეყვანაზე’’, - აცხადებს ავთანდილ დავითაძე.

ნინო ექვთიმიშვილი