პოლიტიკა

ენმ სუს-ის უფროსის მოადგილეს კორუფციაში ადანაშაულებენ

„ერთიანი ნაციონალური მოძრაობა“ პროკურატურას მიმართავს, საქართველოს უსაფრთხოების სამსახურის უფროსის მოადგილის იოსებ გოგაშვილის წინააღმდეგ გამოძიება დაიწყოს. პარტია მას კორუფციულ გარიგებებში ადანაშაულებს.

პარტიის წევრებმა ლევან ბეჟუაშვილმა და გოგა ონიანმა აღნიშნულ საქმეზე სარჩელი უკვე შეიტანეს.

ენმ-ის წევრის, ლევან ბეჟაშვილის განცხადებით, თანამდებობის დაკავებამდე გოგაშვილი სოციალურად დაუცველთა ბაზაში ირიცხებოდა „აშკარაა კლასიკური კორუფციული სქემა. ადამიანი, რომელიც 2013 წელს სოციალურ დახმარებას ღებულობს, ძალიან დიდი ქონების პატრონი გახდა მას შემდეგ, რაც თანამდებობაზე დაინიშნა და საჯარო სამსახურსი მოხვდა. ასევე აქ საუბარი შეიძლება იყოს უკანონო გამდიდრებაზე, სხვა კორუფციულ სამართალდარღვევაზე, რომელიც კანონით განსაზღვრიულია. სულ მცირე პროკურატურამ უნდა დაიწყოს ამ საქმეზე გამოძიება“, - განაცხადა ბეჟუაშვილმა.

გოგა ონიანის თქმით, გოგაშვილი მულტიმილიონერია მიუხედავად იმისა, რომ საჯარო სამსახურში მუშაობა მას ბიზნესის წარმოების უფლებას არ აძლევს.

დღეს ასევე გოგაშვილის გადადგომის მოთხოვნით ე.წ. მოდულის შენობასთან ენმ-ის ახალგაზრდული ფრთა აქციას მართავს.

გოგაშვილის შესაძლო კორუფციულ საქმიანობაზე კვირას გადაცემა „პოსტქრიპტუმში“ სიუჟეტი გავიდა, რომლის მიხედვით გოგაშვილმა თავისი ცოლის დებზე ფიქციურად გადააფორმა უძრავი ქონება, რაც მის დეკლარაციაში მითითებული არაა.

ანა მებურიშვილი