პოლიტიკა

ენმ საარჩევნო უბნებზე შესაძლო გაყალბების ფაქტების გამოძიებას ითხოვს

„ნაციონალური მოძრაობა“ პროკურატურას მიმართავს და საპრეზიდენტო არჩვენების დღეს ცალკეულ უბნებზე შესაძლო გაყალბების ფაქტების გამოძიებას ითხოვს.

„ნაციონალური მოძრაობის“ წევრის, ლევან ბეჟაშვილის თქმით, სარჩელს ვიდეო და სხვა მტკიცებულებებიც დაურთეს.

როგორც ბეჟაშვილმა აღნიშნა, ამ ეტაპზე, პროკურატურას 11 საარჩევნო უბანზე განვითარებული მოვლენების გამოძიების მოთხოვნით მიმართეს.

მისივე თქმით, სხვა უბნების შესახებ ინფორმაცია გროვდება და მთავარ საგამოძიებო უწყებას მოგვიანებით გადაეცემა.

,,გვაქვს რამდენიმე ასეული ასეთი ჩანაწერი, რომლებიც ადასტურებს ამ გაყალბების ფაქტებს.

მიუხედავად ამ ინფორმაციისა, საზოგადოებას არ აქვს ინფორმაცია, რა საგამოძიებო მოქმედებები ჩატარდა.

პროკურატურას მივმართავთ გატარდეს საგამოძიებო მოქმედებები, დაიკითხონ ის ადამიანები, რომლებიც ჩართული იყვნენ ამ გაყალბებაში , რაც მთავარია მოხდეს მათი დაკავება, იმიტომ რომ შესაძლოა, ისინი უკვე მტკიცებულებებს აყალბებენ, რათა ხელი შეუშალონ გამოძიებას,“- ამბობს ლევან ბეჟაშვილი.