პოლიტიკა

ენმ პარლამენტში ანტიტერორისტული ოპერაციის საქმეზე საგამოძიებო კომისიის შექმნას მოითხოვს

,,ნაციონალური მოძრაობა“ პარლამენტის ბიუროს სხდომაზე 22 ნოემბრის ანტიტერორისტული ოპერაციის საქმეზე საგამოძიებო კომისიის შექმნას მოითხოვს.

ოპოზიციური პარტიის ლიდერების განცხადებით, კომისიის ფარგლებში პასუხის უნდა გაეცეს კითხვას, თუ როგორ მოხვდა საერთაშორისო ტერორისტი აჰმედ ჩატაევი თბილისში.

,,ეს ჩავარდნები გამოსაძიებელია და პასუხისმგებლობის საკითხი დასაყენებელია იმ პირების წინაშე, რომლებიც ვერ გაუმკლავდნენ ამოცანას.

ქალაქში ან შემოეპარათ ან შემოიყვანეს ტერორისტები, მალავდნენ მათ და მერე მთელი უბნის, მთელი დედაქალაქის სერიოზული ნაწილის სიცოცხლე ჩააგდეს საფრთხეში“,-აცხადებს ,,ნაციონალური მოძრაობის“ წევრი ნიკა რურუა.

,,ნაციონალური მოძრაობის“ ინიციატივას უერთდება ,,ევროპული საქართველოც“. დღესვე საპარლამენტო უმცირესობა ბიუროზე კიდევ ერთხელ დააყენებს რამდენიმე მინისტრის - მათ შორის მიხეილ ჯანელიძის საკანონმდებლო ორგანოში მისვლის საკითხს.

,,ეს ეხება რამდენიმე საგამოძიებო კომისიას კონკრეტულ საკითხებთან დაკავშირებით . საზედამხედველო საქმიანობის უფრო ეფექტურ განხორციელებას პარლამენტში, რაც ბუნებრივია უკავშირდება მთავრობის წევრების მოსვლას და ანგარიშებს,“-აცხადებს ფრაქცია ”ევროპული საქართველო - მოძრაობა თავისუფლებისთვის” თავმჯდომარე გიგი წერეთელი.