სამართალი

ენმ-ის გუშინდელ აქციაზე დაკავებული სამი პირის სასამართლო პროცესი 17 ოქტომბრამდე გადაიდო

თბილისის საკრებულოსთან „ნაციონალური მოძრაობის“ მიერ გუშინ გამართულ აქციაზე დაკავებული სამი პირის: სოსო გურულის, ზურაბ ბერიაშვილისა და პაატა დევიძის სასამართლო პროცესი 17 ოქტომბრამდე გადაიდო, ზემოთ ჩამოთვლილები კი სასამართლო დარბაზიდან გაათავისუფლეს.

მოსამართლემ სხდომა დაკავებულების მიერ ადმინისტრაციული სამართალდარღვევის ჩადენის დამადასტურებელი მტკიცებულებების წარდგენის მოტივით გადადო.

გათავისუფლებულების თქმით, პოლიციამ ისინი უკანონოდ დააკავა. ზურაბ ბერიაშვილის ინფორმაციით, სამართალდამცავებმა მას ფიზიკური და სიტყვიერი შეურაცხყოფა მიაყენეს.

„გუჯა ჯღარკავამ და სუს-მა დამაკავა. პოლიციის ზოგიერთი თანამშრომელი იქცეოდა გამომწვევად, ისინი აქციის მონაწილეებს აგინებდნენ. დაკავების დროს ფიზიკური და სიტყვიერი შეურაცხყოფა მომაყენეს", - განაცხადა ზურაბ ბერიაშვილმა.

გუშინდელ აქციაზე სულ 8 პირი დააკავეს.

შეგახსენებთ, გუშინ თბილისის საკრებულოში განიხილავდნენ თაბორის მთასა და პუშკინის სკვერთან მდებარე მიწის ნაკვეთების პრივატიზების საკითხს. სხდომის პარალელურად, ამ გადაწყვეტილების გასაპროტესტებლად „ნაციონალურმა მოძრაობამ“ აქცია გამართა, სადაც სიტუაცია რამდენჯერმე დაიძაბა. ტერიტორიაზე იყო მობილიზებული ასობით პოლიციელი და სპეცდანიშნულების რაზმის წარმომადგენელი.