პოლიტიკა

ენმ-ის გუშინდელ აქციაზე დაკავებულებს დაზიანებები აღენიშნებათ - სახალხო დამცველი

საქართველოს სახალხო დამცველის, უჩა ნანუაშვილის განცხადებით, „ნაციონალური მოძრაობის“ გუშინდელ აქციაზე დაკავებულ რამდენიმე პირს დაზიანებები აღენიშნებათ.

„ჩემმა წარმომადგენლებმა მოინახულეს დაკავებულები. მათ აღენიშნებათ დაზიანებები სხეულზე, თუმცა ექიმის თქმით, ეს დაზიანებები არ არის სერიოზული. ჩვენ მიერ გამოთხოვილია დოკუმენტაცია, მაგრამ ის ფაქტი, რომ ერთ-ერთ მათგანს გაუკეთეს ფიქსატორი, რომელიც 10 დღის განმავლობაში უნდა ატაროს, ადასტურებს, რომ დაზიანებები მათ რეალურად დაკავების დროს მიადგათ. ეს ფაქტი საგამოძიებო უწყებებმა უნდა შეისწავლონ და ჩვენ პროცესს ყურადღებით დავაკვირდებით“, - განაცხადა ომბუდსმენმა.

შეგახსენებთ, გუშინ თბილისის მერიასთან ენმ-ამ აქცია ჩაატარა, სადაც გააპროტესტა თბილისის საკრებულოს 29 სექტემებრის გადაწყვეტილება, რომლის თანახმად ბიძინა ივანიშვილს პუშკინის სკვერთან და თაბორის მთაზე მიწის ნაკვეთები გადაეცა.

ენმ-ის წევრები დავით ნარმანიასთან 4-კაციანი დელეგაციის თბილისის მერიაში შეყვანას ითხოვდნენ, რამაც დაძაბულობა გამოიწვია აქციის მონაწილეებსა და პოლიციას შორის. შეკრებაზე 6 პირი დააკავეს ადმინისტრაციული სამართალდარღვევათა კოდექსის 166-ე და 173-ე მუხლებით გათვალისწინებული ქმედებების გამო.

ანა მებურიშვილი