პოლიტიკა

„ენერგო პრო ჯორჯიას“ პასუხისმგებლობა არ იკვეთება - „მთის კურორტების განვითარების კომპანიის“ ხელმძღვანელი გუდაურის საბაგიროზე

ეკონომიკისა და მდგრადი განვითარების სამინისტროს „მთის კურორტების განვითარების კომპანიის“ ხელმძღვანელის, სანდრო ონოფრიშვილის განცხადებით, გუდაურის საბაგიროზე მომხდარ ინციდენტში „ენერგო-პრო ჯორჯიას“ პასუხისმგებლობა არ იკვეთება.

„ „ენერგო -პრო ჯორჯიას“ მის ქსელში ძაბვის ვარდნა არ ჰქონია, ეს არის ჩვენი ქსელი, ჩვენი ტრანსფორმატორი და იქ იყო ძაბვის ვარდნა, ამიტომ, ჩემი აზრით, მის ქსელში როცა არ იყო, მისი პასუხისმგებლობა არ იკვეთება“,-თქვა ონოფრიშვილმა.

მისივე ინფორმაციით, გუდაურში მომხდარის გამო ოპერატორს შეუჩერდა უფლებამოსილება. თანამდებობები დატოვეს „მთის კურორტების განვითარების კომპანიის“ უფროსის მოადგილემ და გუდაურის მთის მართვის დეპარტამენტის უფროსმა.

„ასევე ჩემმა მოადგილემ და გუდაურის მთის მართვის დეპარტამენტის უფროსმა საკუთარი სურვილით გადაწყვიტეს, რომ მათ აქვთ ის მორალური პასუხისმგებლობა, როგორც ყველა ჩვენგანს, მაგრამ მათ განაცხადეს, რომ დროებით შეუჩერდეთ უფლებამოსილება. განცხადება დაწერილია. ეს მათი ინიციატივაა და არა კომპანიის. რა მოხდა ამას გამოძიება დაადგენს“, - განაცხადა ონოფრიშვილმა.

ონოფრიშვილის მტკიცებით, კომპანიის თანამშრომლების გადამზადება სისტემატურად ხდება.

„30-მდე თანამშრომელმა თავად „დოპელმაიერის “ სათავო ოფისში გაიარა მომზადება. წელიწადში რამდენჯერმე ავსტრიელი და ფრანგი ტრენერები ჩამოდიან, რომლებიც თანამშრომლებს შესაბამის ტრენინგებს უტარებენ“, -თქვა ონოფრიშვილმა.

16 მარტს გუდაურის სათხილამურო ტრასაზე საბაგირო მწყობრიდან გამოვიდა, რომლის შედეგად 10-მდე ადამიანი დაშავდა.