სამართალი

ელისო კილაძე სახალხო დამცველს ,,ქრონიკა პლუსის’’ წინააღმდეგ დაგეგმილ კამპანიაში ადანაშაულებს

ჟურნალისტი ელისო კილაძე ომბუდსმენს ,,ქრონიკა პლუსის’’ წინააღმდეგ ბრძოლაში ადანაშაულებს და ამბობს, რომ ხელისუფლება სახალხო დამცველს მისი გაზეთის წინააღმდეგ იყენებს.

შესაბამისი განცხადება ,,ქრონიკა პლუსის’’ რედაქტორმა მთავარი პროკურატურის დატოვების შემდეგ გააკეთა, სადაც მის მიერ გასულ წელს პატიმართა წამების ამსახველი კადრების სრული ვერსიის გამოქვეყნების საკითხზე ჩვენება მისცა.

მისი თქმით, საგამოძიებო უწყებაში ის დღეს დაიბარეს, სწორედ უჩა ნანუაშვილის მიმართვის საფუძველზე.

კილაძის ინფორმაციით, სახალხო დამცველმა პროკურატურას მიმართა, რომ ელისო კილაძემ ე.წ. ცოცხების კადრების გასაჯაროებით ერთ-ერთი პატიმრის პატივი და ღირსება შელახა, ხოლო ამ პატიმარმა სახალხო დამცველს მიმართა, რათა მას რეაგირება მოეხდინა.

„გამაცნეს სახალხო დამცველის მიმართვა, რომელიც ითხოვს ჩემს დასჯას იმის გამო, რომ მოიძებნა ვიდეოში ასახული ერთ-ერთი პირი, რომელსაც დასცინიან თუ აწამებენ. ამ ადამიანმა განცხადებით მიმართა რატომღაც სახალხო დამცველს. გამომდინარე იქიდან, რომ სახალხო დამცველიც არის ერთ-ერთი ორგანო, მე მინდა განვუმარტო მას კანონი სიტყვის და გამოხატვის თავისუფლების შესახებ, სადაც ძალიან მკაფიოდ არის ნათქვამი: პირი, რომელსაც მიადგა მათ შორის მორალური ზიანი, მიდის სასამართლოში, როგორც წესი. უჩა ნანუაშვილი არის არა სახალხო დამცველი, არამედ ხელისუფლების გაგრძელება. ის პირდაპირ არის ჩართული დამოუკიდებელი მედიასაშუალების წინააღმდეგ დევნის საქმეში. ეს არის ხელისუფლების მიერ დაგეგმილი კამპანია ქრონიკა პლუსის წინააღმდეგ, რომელსაც სახალხო დამცველის, უჩა ნანუაშვილის მეშვეობით ახორციელებს,“- განაცხადა ელისო კილაძემ.

ნინო ექვთიმიშვილი