პოლიტიკა

ელისო კილაძე პროკურატურის დაცვის პროგრამაზე უარს ამბობს

„ქრონიკა +“-ის რედაქტორმა ელისო კილაძემ უარი თქვა უმრავლესობის წევრ არჩილ თალაკვაძის შეთავაზებაზე, რომლის მიხედვით „ერთიანი ნაციონალური მოძრაობის“ მხრიდან შესაძლო პროვოკაციის გამო პროკურატურამ ჟურნალისტი დაცვის პროგრამაში უნდა ჩართოს.

„არჩილ თალაკვაძეს ჩემთვის დაცვის სპეციალური პროგრამა მოუთხოვია, ნაცები პროვოკაციებს მოუწყობენ და ხელისუფლებას დაგვაბრალებენო! განვმარტავ - უარს ვამბობ ხელისუფლების მხრიდან ყველა მსგავს შემოთავაზებაზე, არ მეშინია და არ ვსაჭიროებ არანაირ დაცვას. დაცვის სპეციალური პროგრამა შესთავაზეთ კორუმპირებულ, მექრთამე სუს-ის უფროსის მოადგილეს-თქვენი ხელისუფლების სახეს იოსებ გოგაშვილს !“, - დაწერა კილაძემ ფეისბუკის საკუთარ გვერდზე.

შეგახსენებთ, რომ უმრავლესობის წევრის, არჩილ თალაკვაძის განცხადებით, შესაძლოა, „ერთიანმა ნაციონალურმა მოძრაობამ“ სუს-ის უფროსის მოადგილის, სოსო გოგაშვილის დისკრედიტაციის მიზნით პროვოკაცია დაგეგმოს ელისო კილაძის წინააღმდეგ.

ანა მებურიშვილი