სამართალი

ელისო კილაძე არ გამორიცხავს, რომ დღეს მას ბრალი წაუყენონ

,,ქრონიკა პლუსის’’ რედაქტორი ელისო კილაძე მის მიერ გასულ წელს პატიმართა წამების ამსახველი კადრების სრული ვერსიის გამოქვეყნების საკითხზე მთავარ პროკურატურას ჩვენებას აძლევს.

საგამოძიებო უწყებაში შესვლამდე ელისო კილაძემ ჟურნალისტებთან კომენტარი გააკეთა.

„ისინი კითხულობენ კანონის მხოლოდ მეორე მუხლს, სადაც ლაპარაკია განსაკუთრებულ შემთხვევებზე, მაგრამ არ კითხულობენ და არ აქვთ წაკითხული ამავე კანონის 45-ე მუხლი, სადაც მკაფიოდ წერია, ყველაფერი რომ დამერღვია, რაც ამ კანონში მუხლებია ჩამოთვლილი, მე მეკუთვნის მხოლოდ ადმინისტრაციული წესით დაჯარიმება. თუ მიდიან ,,ქრონიკა პლუსის’’ დახურვაზე, ესეც არის ერთი ამბავი და გამოჩნდება დღეს, მკაფიოდ მეტყვიან, თუ მედავებიან იმას, რომ ეს კანონი დავარღვიე. ამ კანონის დარღვევა არის ადმინისტრაციული სამართალდარღვევა. ვერცერთ შემთხვევაში ეს არ არის სისხლის სამართლის დანაშაული,“- განაცხადა ელისო კილაძემ.

ჟურნალისტი არ გამორიცხავს, რომ მას დღეს ბრალიც წარედგინოს.

„ამ პროკურატურის პირობებში, რომელიც არის პოლიტიკური პროკურატურა და პოლიტიკური დამკვეთების პროკურატურა, არ გამოვრიცხავ, რომ ასეც მოხდეს,“- აღნიშნა კილაძემ.

ნინო ექვთიმიშვილი