პოლიტიკა

ელექტროენერგიაზე გადასახადი ისევ იზრდება - ენმ

„ერთიანი ნაციონალური მოძრაობის“ წევრის, ოთარ სირაძის განცხადებით, ელექტროენერგიაზე ფასები ისევ მოიმატებს. ტარიფების ზრდის მიზეზად მან ლარის გაუფასურება დაასახელა, რაც მთავრობის არასწორი ეკონომიკური პოლიტიკით იყო გამოწვეული.

სირაძემ აღნიშნულის გამო მთავრობას მოუწოდა, გადახედოს 2018 წლის ბიუჯეტს და მოუმატოს პენსიონერებსა და სოციალურად დაუცველებს დახმარება, რადგან მისი აზრით, მათ „ყველაზე მეტად ტვირთად აწვება ეს პრობლემები“.

„ „ქართულმა ოცნებამ“ საახალწლო საჩუქარი გაუკეთა საქართველოს მოსახლეობას. ელექტროენერგიაზე გადასახადი ისევ იზრდება. ეს არის უშუალოდ მთავრობის დანაშაულებრივი პოლიტიკის შედეგი. ჩვენ მათ არაერთხელ ვაფრთხილებდით, რომ თუ არ გადადგამდნენ აუცილებელ ნაბიჯებს ეკონომიკის განვითარებისთვის, ლარი გაუფასურდებოდა და ის ნეგატიურად აისახებოდა როგორც ფასებზე, ასევე ტარიფებზე.

ლარის გაუფასურება არის ერთ-ერთი მთავარი მიზეზი ეკონომიკური პრობლემებისა, რომლებშიც დღეს ჩვენ ვიმყოფებით და ეს ასევე არის მთავრობის არასწორი ეკონომიკური პოლიტიკის შედეგი, რომლის შეცვლასაც მთავრობა ჯიუტად არ აპირებს. ლარის გაუფასურებამ გამოიწვია საწვავის , მედიკამენტების, სურსათის, ასევე დენისა და გაზის ტარიფების ისტორიულ მაქსიმუმდე გაზრდა.

რაც ყველაზე საგანგაშოა, ეს პროცესი არის შეუქცევადი „ქართული ოცნების“ ხელისუფებაში არსებობის პირობებში და, ჩვენდა სამწუხაროდ, მოსალოდნელია, მომავალში როგორც ფასების , ასევე ტარიფების ზრდაც. ამ ფონზე კი მთავრობის პასუხი პენსიონერებსა და სოციალურად დაუცველ ოჯახებს, რომლებსაც ყველაზე მეტად მძიმე ტვირთად აწვება ეს პრობლემები, არის პენსიაზე და სოციალური შემწეობის ზრდაზე უარი, რაც ნიშნავს ამ ადამიანების ბედის ანაბარად მიტოვებას. ამიტომ კატეგორიულად მოვითხოვთ პრემიერ-მინისტრისგან, გარდა იმ აუცილებელი გადასადგმელი ნაბიჯებისა მთავრობამ გადახედოს ახალ ბიუჯეტს და 2018 წლის იანვრიდანვე მოხდეს როგორც პენსიების მინიმუმ 50 ლარით, ასევე სოციალური დახმარებების ზრდა“, -განაცხადა სირაძემ.

ანა მებურიშვილი