პოლიტიკა

ეკონომიკის სამინისტროში ლიბერტარიანიზმის ერთგვარი სული კვლავ ტრიალებს - თენგიზ შერგელაშვილი

„შენების მოძრაობის“ ერთ-ერთი ლიდერის, თენგიზ შერგელაშვილის განცხადებით, რეგიონული განვითარებისა და ინფრასტრუქტურის მინისტრის მოადგილის თანამდებობაზე მუშაობის დროს მუდმივად წინააღმდეგობა ჰქონდა ეკონომიკის სამინისტროსთან.

როგორც მან აღნიშნა პირველი არხის გადაცემაში - „კვირის ინტერვიუ“, „ეკონომიკის სამინისტროში ლიბერტარიანიზმის ერთგვარი სული კვლავ ტრიალებს“.

„ჩვენი ეკონომიკა როგორ უნდა განვითარდეს, ამის სრულყოფილი სისტემური ხედვა არ არსებობს. ამის მიზეზი ზოგიერთ შემთხვევაში არაკომპეტენტურობაა, ზოგ შემთხვევაში კი მენტალურ–მსოფლმხედველობრივი საკითხი“, – განაცხადა შერგელაშვილმა.

შერგელაშვილმა აღნიშნა, რომ მუნიციპალიტეტების დაფინანსებასთან დაკავშირებით შარშანწინ არსებობდა კანონპროექტი, რომლითაც მუნიციპალური და რეგიონალური განვითარების ფონდები უნდა შერწყმულიყო. შედეგად ჩამოყალიბდებოდა კარგი ფინანსური ინსტრუმენტი, რაც გრანტსა და სესხს დააბალანსებდა, მაგრამ პოლიტიკური ნების არარსებობის გამო პროცესი გაიყინა.

მან დაამატა, რომ 2013 წელს სხვადასხვა სამინისტრომ რეფორმებზე ფიქრი დაიწყო, მაგრამ თანდათანობით, მათ შორის ინფრასტრუქტურული მიმართულებით, ეკონომიკური პოლიტიკა „ნაციონალური მოძრაობის“ მმართველობის პერიოდს დაუბრუნდა, როცა ეკონომიკა, აღქმული იყო არა როგორც სისტემა, არამედ როგორც ცალკეული პროექტების ერთობლიობა.

„შენების მოძრაობის” ერთ-ერთმა ლიდერმა ასევე აღნიშნა, რომ საპრეზიდენტო არჩევნებზე „შენების მოძრაობას“ საკუთარი კანდიდატი ეყოლება, რომლის ვინაობასაც შესაბამის დროს დაასახელებს.