პოლიტიკა

ეკლესიის ამ დონის ფიგურები ერევიან საარჩევნო კამპანიაში, რაც ნამდვილად არ არის მათი საქმე და რაშიდაც არ უნდა ერეოდნენ - სალომე ზურაბიშვილი

„ქართული ოცნების“ მიერ მხარდაჭერილმა საპრეზიდენტო კანდიდატმა სალომე ზურაბიშვილმა უკმაყოფილობა გამოთქვა, რომ სასულიერო პირები აქტიურად ერევიან საარჩევნო კამპანიაში. ტელეკომპანია „იმედის“ ეთერში მან სასულიერო პირები სახელმწიფოსა და ეკლესიას შორის გაფორმებული კონკორდატის დარღვევაში დაადანაშაულა.

„მე არ მესმის, როგორ შეიძლება, ეკლესია ამ დონეზე იღებდეს მონაწილეობას საარჩევნო კამპანიაში და სხვათა შორის, როგორც პრეზიდენტი, როგორც პასუხისმგებელი ეკლესიისა და სახელმწიფოს შორის კონკორდატის შესრულებაზე, მე ამაზე მექნება ძალიან ძლიერი პროტესტი, რადგან ეს არის დარღვევა ყველა იმ შეთანხმების, რაც არსებობს მართლმადიდებელ ეკლესიას და სახელმწიფოს შორის, რომ ჩაერიოს ამ დონით და პირდაპირ ბრალდებებით. ეკლესიის ამ დონის ფიგურები ერევიან იმაში, რაც ნამდვილად არ არის მათი საქმე და რაშიდაც არ უნდა ერეოდნენ, ერთი მხრივ თუ მეორე მხრივ , არც მხარდაჭერითა და არც ლანძღვა-გინებით, რაც არ ეკადრება, არც ჩვეულებრივ ადამიანს და კიდევ ნაკლებად მეუფეებს“, - განაცხადა ზურაბიშვილმა.

სალომე ზურაბიშვილი მის მიერ გაკეთებული განცხადებების გამო პატრიარქის ქორეპისკოპოსმა მეუფე იაკობმა, ჭყონდიდელმა მიტროპოლიტმა პეტრემ, ასევე მეუფე გრიგოლმა და მეუფე მელქისედეკმა გააკრიტიკეს.