პოლიტიკა

ეკა მიშველაძე - ლარის კურსზე: პრეზიდენტი ენდობა გიორგი კვირიკაშვილსა და კობა გვენეტაძეს

პრეზიდენტის პრესსპიკერმა, ეკა მიშველაძემ ლარის კურსის გაუფასურებასთან დაკავშირებით განაცხადა, რომ გიორგი მარგველაშვილი პრემიერსა და ეროვნული ბანკის პრეზიდენტს ენდობა.

,,საქართველოს პრეზიდენტს ქვეყნის ეკონომიკაში შექმნილ რთულ ვითარებასთან დაკავშირებით აქტიური კომუნიკაცია აქვს პრემიერ-მინისტრთან და ეროვნული ბანკის პრეზიდენტთან. ქვეყნის პირველი პირი ენდობა გიორგი კვირიკაშვილსა და კობა გვენეტაძეს და მიიჩნევს, რომ მათი კვალიფიკაცია და ურთიერთთანამშრომლობა გამოიღებს ეფექტიან შედეგს და უახლოეს მომავალში ეროვნული ვალუტის სტაბილიზაცია მოხერხდება’’- განაცხადა ეკა მიშველაძემ დღევანდელ ბრიფინგზე.

პრეზიდენტის პრესსპიკერი ასევე გამოეხმაურა ნაციონალური მოძრაობის მოწოდებას მთავრობის ეკონომიკური გუნდის პარლამენტში დაბარებასთან დაკავშირებით.

„ქვეყანაში მიმდინარე პროცესებთან დაკავშირებით პასუხისმგებლობა საქართველოს მთავრობასა და ხელისუფლებას ეკისრება. მისასალმებელია ოპოზიციის აქტიურობა და ზოგადად, ყველა პოლიტიკური აქტორის ჩართულობა ამ პროცესში. ამ პროცესის ღიაობა ძალიან მნიშვნელოვანია, არამარტო იმ კუთხით, რომ რამენაირად არსებული ვითარებიდან გამოსვლა მოხდეს, არამედ თუნდაც ეკონომიკური მოლოდინების დასტაბილურების თვალსაზრისითაც,“ - განაცხადა ეკა მიშველაძემ.

ნინო ექვთიმიშვილი