პოლიტიკა

ეკა ბესელია აპრიორი უშვებს იმას, რომ კანონპროექტი შესაძლოა ეწინააღმდეგებოდეს კონსტიტუციას - ანრი ოხანაშვილი

ეკა ბესელია აპრიორი უშვებს იმას, რომ კანონპროექტი შესაძლოა ეწინააღმდეგებოდეს კონსტიტუციას, ეს არის მისი პოზიცია. საკომიტეტო განხილვისას ეს პოზიცია გაჟღერდა, რომ მართალია, ჩვენ შესაძლოა კონსტიტუციის საწინააღმდეგო კანონი მივიღოთ, მაგრამ საკონსტიტუციო სასამართლომ იმსჯელოს ამაზე. ეს არის ძალიან დიდი საფრთხის და რისკის შემცველი, - ამის შესახებ პარლამენტის იურიდიულ საკითხთა კომიტეტის თავმჯდომარემ ანრი ოხანაშვილმა პარლამენტის სხდომაზე სიტყვით გამოსვლისას განაცხადა.

„როცა ეკა ბესელია საუბრობდა, მე დამრჩა შთაბეჭდილება, რომ ის არ იზიარებს უვადოდ დანიშვნის პრინციპის კონსტიტუციურ არსს. თავის დროზე, ქალბატონი ეკა ერთ-ერთი გახლდათ, რომელმაც საკონსტიტუციო სასამართლოს გადაწყვეტილების შესაბამისად მოახდინა ორგანულ კანონში ცვლილების განხორციელება და სწორედ მან დაუჭირა მხარი იმას, რომ საკონსტიტუციო სასამართლოს გადაწყვეტილება უნდა აღსრულებულიყო და ეს არის სწორი.

სასამართლომ დაადგინა მიდგომა, რომ მოსამართლეს, რომელსაც აქვს 10-წლიანი დამსახურება და მან იმსახურა 10-წლიანი ვადით, ამ შემთხვევაში აქვს ლეგიტიმური უფლება, გამწესდეს უვადოდ. მე და ჩემს კოლეგებს არ გვახსოვს, რომ აღნიშნულ პრინციპზე ეკა ბესელიას, ან სხვა კოლეგებს დაესვათ კითხვა და ეთქვათ, რომ ეს იყო კონსტიტუციასთან შეუსაბამო. რა შეიცვალა დღეს? ჩვენ გვაქვს ლეგიტიმური ნდობა კომიტეტის თავმჯდომარისადმი, როცა ის წარმოადგენს კომიტეტის პოზიციას, რომ იზიარებს ამა თუ იმ პრინციპს.

ჩემთვის გაუგებარია, თუკი თავის დროზე ქალბატონი ეკა გახლდათ ინიციატორი იმის, რომ აღსრულებულიყო აღნიშნული უვადოდ დანიშვნის პრინციპი, რამდენად სწორია პრინციპი, რომ ეს საკითხი დღეს მივანდოთ საკონსტიტუციოს სასამართლოს?! აქაც ეკა ბესელია აპრიორი უშვებს იმას, რომ კანონპროექტი შესაძლოა ეწინააღმდეგებოდეს კონსტიტუციას, ეს არის მისი პოზიცია. საკომიტეტო განხილვისას ეს პოზიცია გაჟღერდა, რომ მართალია, ჩვენ შესაძლოა კონსტიტუციის საწინააღმდეგო კანონი მივიღოთ, მაგრამ საკონსტიტუციო სასამართლომ იმსჯელოს ამაზე. ეს არის ძალიან დიდი საფრთხის და რისკის შემცველი. ეს არის არასწორი მიდგომა, რომელიც ეწინააღმდეგება სამართლიანობის იდეას“, - განაცხადა ანრი ოხანაშვილმა.

შეგახსენებთ, რომ ინიციატივის თანახმად, ცვლილებები უნდა შევიდეს “საერთო სასამართლოების შესახებ“ ორგანულ კანონში, რომელიც 2024 წლის 31 დეკემბრამდე საქალაქო და სააპელაციო სასამართლოებში მოსამართლეთა უვადოდ გამწესების შეჩერებას ითვალისწინებს.

საკანონმდებლო ინიციატივას პარლამენტის ცხრა წევრი: ეკა ბესელია, გედევან ფოფხაძე, ლევან გოგიჩაიშვილი, ოთარ ჩრდილელი, ალექსანდრე ერქვანია, ზვიად კვაჭანტირაძე, კობა ნარჩემაშვილი, დავით ჭიჭინაძე და ლევან კობერიძე აწერენ ხელს.