პოლიტიკა

ეკა ბესელია აფგან მუხთარლის საქმეზე დროებითი საპარლამენტო საგამოძიებო კომიისიის შექმნას ამ ეტაპზე მიზანშეწონილად არ თვლის

პარლამენტის იურიდიულ საკითხთა კომიტეტის თავმჯდომარე, ეკა ბესელია, აზერბაიჯანელი ჟურნალისტის, აფგან მუხთარლის, საქმეზე დროებითი საპარლამენტო საგამოძიებო კომისიის შექმნას ამ ეტაპზე მიზანშეწონილად არ მიიჩნევს.მისი თქმით, ეს საქმის პოლიტიზირებას კიდევ უფრო მოახდენს, ვიდრე ამას მათი ოპონენტები ცდილობენ.

ბესელიას თქმით, უმჯობესი იქნება ყველა სამართლებრივი მექანიზმი სრულად გამოიყენონ, იმისთვის, რომ საქმეზე საბოლოო შედეგი დადგეს.

„საჭიროა, ასეთი განსაკუთრებული მნიშვნელობის საქმეები პოლიტიკური პროცესისგან დისტანცირებული იყოს, რადგან მათ მიმართ როგორც შიდა, ასევე საერთაშორისო ინტერესის თვალსაზისით, მეტი ყურადღება არსებობს. სწორედ ამ არგუმენტით, ამ ეტაპზე საგამოძიებო კომისიის შექმნას მხარს არ დავუჭერდი. ამ კომისიის შექმნა მიზანშეწონილად არ მიმაჩნია, რადგან ეს ამ საქმის პოლიტიზირებას იმაზე უფრო მეტად მოახდენს, ვიდრე ამას ჩვენი ოპონენტები ცდილობენ”, – განაცხადა ბესელიამ.

შეგახსენებთ, რომ „ევროპული საქართველო“ აფგან მუხთარლის საქმეზე დროებითი საგამოძიებო კომისიის შექმნას ითხოვს. აღნიშნულ საკითხზე, სავარაუდოდ, 23 თებერვლის პლენარულ სხდომაზე იმსჯელებენ.

ჟურნალისტი აფგან მუხთარლი 2017 წლის 29 მაისს თბილისიდან გაუჩინარდა. მეორე დღეს მან ადვოკატს განუცხადა, რომ ის, ძალის გამოყენებით, აზერბაიჯანში გადაიყვანეს. აფგან მუხთარლის ბაქოს სასამართლომ 6 წლით თავისუფლების აღკვეთა 12 იანვარს მიუსაჯა. ჟურნალისტს ბრალად სამართალდამცველებისთვის წინააღმდეგობის გაწევა, საზღვრის უკანონო კვეთა და კონტრაბანდის გადატანა ედება. ის ბრალს არ აღიარებს.