პოლიტიკა

ე. წ. ქურდული სამყაროს შესახებ კანონპროექტის განხილვის ფორმატის გამო ეკა ბესელიამ და უმრავლესობის წევრებმა იკამათეს

იურიდიულ საკითხთა საპარლამენტო კომიტეტის სხდომაზე ე. წ. ქურდული სამყაროსა და ორგანიზებული დანაშაულის შესახებ შსს-ის საკანონმდებლო პროექტის განხილვის ფორმატი კომიტეტის თავმჯდომარეს, ეკა ბესელიასა და უმრავლესობის ცალკეულ წევრებს შორის ცხარე კამათის მიზეზი გახდა.

კანონპროექტი მეორე მოსმენით გადის. დეპუტატებმა ვანო ზარდიაშვილმა და ანრი ოხანაშვილმა ამ განხილცის დახურულ ფორმატში ჩატარების ინიციატივით გამოვიდნენ, რაზეც ბესელიამ უარი განაცხადა.

ზარდიაშვილის განმარტებით, აღნიშნული საკანონმდებლო ცვლილებების განხილვის დახურვის მიზანი არის მხოლოდ სამართლებრივი, რადგან არსებობს საკითხები, რაზეც კითხვას საჯარო ფორმატში ვერ დასვამს, რადგან ამით ”ქურდული სამყაროს” წარმომადგენლებს ფორა მიეცემათ. ოხანაშვილი მას დაეთანხმა და აღნიშნა, რომ დეპუტატებს აქვთ შეკითხვები, რაზეც საუბარი მიზანშეწონილია, რომ მხოლოდ დახურულ ფორმატში წარიმართოს.

ბესელიამ თანაგუნდელებს უპასუხა, რომ საკანონმდებლო ცვლილებები ცნობილი უნდა იყოს მოქალაქეებისთვის, კერძოდ, რა მუხლები მკაცრდება და რისთვის. მან აღნიშნა, რომ ამ ინფორმაციის მიწოდებას პრევენციული დატვირთვაც აქვს.

საბოლოოდ სხდომის წამყვანის პოზიციის გათვალისწინებით, საკანონმდებლო პაკეტის მეორე მოსმენით განხილვა, ღია ფორმატში წარიმართა.

აღნიშნული გადაწყვეტილების გამო განხილვა დატოვეს ანრი ოხანაშვილმა, დავით მათიკაშვილმა, ვანო ზარდიაშვილმა და გიორგი ხატიძემ.

ე. წ. ქურდული სამყაროს შესახებ კანონპროექტის განხილვის ფორმატზე დავა პირველი მოსმენის დროსაც. მაშინაც მსჯელობა ღია ფორმატით წარიმართა.