პოლიტიკა

ძიუდოს ფედერაციაში არსებული სიტუაციის შესასწავლად სპეციალური კომისია შეიქმნება

ძიუდოს ფედერაციაში არსებული ვითარების შესასწავლად შეიქმნება სპეციალური კომისია, რომელშიც კულტურის სამინისტროს, სპორტის საპარლამენტო კომიტეტისა და ოლიმპიური კომიტეტის წევრები გაერთიანდებიან. ამის შესახებ კულტურისა და სპორტის მინისტრმა მიხეილ გიორგაძემ განაცხადა.

„შევთანხმდით, რომ ერთობლივი კომისია ჩამოყალიბდა. კომისიის შემადგენლობაში სამინისტროს მხრიდან ვიქნები მე და ჩემი მოადგილეები, აგრეთვე მიხეილ ყაველაშვილი, შოთა ხაბარელი, ლერი ხაბელოვი, სპორტის კომიტეტისა და ოლიმპიური კომიტეტის წარმომადგენლები. იმ კომპეტენციიდან და პოლიტიკური პასუხისმგებლობიდან გამომდინარე, რომელიც ამ ინსტიტუციებს აქვთ, გადაწყვეტილება იქნება მიღებული. უახლოეს დღეებში მოხდება ამ საკითხების შესწავლა და შედეგებს, შესაბამის გადაწყვეტილებას, რომელიც კომისია მიიღებს, საზოგადოებას მივაწვდით. გადაწყვეტილებები მალე იქნება ცნობილი. სიტუაციის სიმწვავიდან გამომდინარე, ამ პროცესს არ გავაჭიანურებთ “, – განაცხადა მინისტრმა.

მან აღნიშნა, რომ დეტალურ ინფორმაციას ძიუდოს ფედერაციიდან გამოითხოვენ.

გიორგაძემ ყველა მხარეს მოუწოდა, თავი შეიკავოს სიტუაციის ესკალაციისგან.

„ჩვენ ვიქნებით მიუკერძოებლები, მკაცრები და თუ რაიმე საკითხი არასწორად იყო გაგებული ერთი ან მეორე მხარის მიერ, ყველაფერს ნათელი მოეფინება. მოვუწოდებ ყველას, რომ სიტუაციის ესკალაცია არ მოხდეს”, – განაცხადა გიორგაძემ.

ძიუდოს ნაკრების წევრები ძიუდოს ფედერაციის პრეზიდენტის, დავიტ ქევხიშვილის გადადგომას ითხოვენ. ამ მოთხოვნით სპორტსმენებმა ორშაბათს აქცია გამართეს.

უკმაყოფილება ევროპის ჩემპიონატზე დაფიქსირებულმა შედეგებმა გამოიწვიეს, როცა ქართველი ძიუდოისტები უმედლოდ დაბრუნდნენ. ამის შემდეგ ეროვნული ნაკრების სამწვრთნელო შტაბის სრული შემადგენლობა გადადგა.