პოლიტიკა

ძიუდოისტების უმეტესობას უშუალოდ ჩემთან საუბრებში არანაირი მოთხოვნები არ აქვთ - დავით ქევხიშვილი

ძიუდოს ფედერაციის პრეზიდენტი, დავით ქევხიშვილი მიესალმება კულტურისა და სპორტის სამინისტროს ინიციატივას, რომ შეიქმნას კომისია, რომელიც ძიუდოს ფედერაციაში შექმნილ სიტუაციას შეისწავლის. ამის შესახებ ქევხიშვილმა ფედერაციის რიგგარეშე ყრილობის შემდეგ განაცხადა, სადაც მოხსენებით წარდგა.

ქევხიშვილმა აღნიშნა, რომ მასთან დაპირისპირებულ ძიუდოისტებს ისეთი კითხვები არ დაუსვამთ, რომლებზეც პასუხის გაცემა შეიძლებოდა.

„ძიუდოისტებს არანაირი კითხვა არ ჰქონდათ ისეთი, რომლებზეც პასუხის გაცემა შეიძლებოდა. უბრალოდ, იყო მცდელობა, რომ საზოგადოებისთვის დაენახებინათ ამ ფორმატში, რომ პრობლემებია ძიუდოს ფედერაციაში. მე მივესალმები კომისიის შექმნას. ყრილობის წინაშე განვაცხადე, თუ რა ხდება რეალურად და ავხსენი არსებული ვითარება. ეს პროცესები ასე არ უნდა გაგრძელდეს. მე არ ვიცავ დავით ქევხიშვილს, მე ვიცავ პრეზიდენტის პოსტს, როგორც ინსტიტუტს. ბიჭების უმეტესობას, რომლებიც აქ იყვნენ, უშუალოდ ჩემთან საუბრებში არანაირი მოთხოვნები არ აქვთ. ისინი ამბობენ, რომ მათ უშუალოდ ჩემთან მოთხოვნები არ აქვთ, უბრალოდ გუნდია და გვინდა რომ ერთად ვიყოთო“!, -თქვა ქევხიშვილმა.

ძიუდოს ფედერაციის პრეზიდენტმა განმარტა, ის ანგარიშვალდებულია ყრილობის წინაშე და ის გადადგება, თუკი ამის შესახებ ყრილობა ეტყვის და არა სპორტსმენები.

ქევხიშვილმა მიმართა ძიუდოს ეროვნული ნაკრების კაპიტანს, ვარლამ ლიპარტელიანს, არ მოახდინოს სიტუაციის პროვოცირება.

„ვარლამ ლიპარტელიანს მინდა მივმართო - მასზე წინ მე ვიყავი გუნდის კაპიტანი 4 წლის განმავლობაში. ზუსტად ასეთი პრობლემები იყო 2009 წელს, როდესაც პრობლემები იყო ნაკრებში. თუმცა არ გამოვსულვარ და საჯაროდ არ მისაუბრია, ჩემი პოზიცია მწვრთნელთან დავაფიქსირე. ბოიკოტი არ გამომიცხადებია შეჯიბრებზე და ა.შ. არ შეიძლება, როდესაც კაპიტანი ხარ, პროვოცირებდე და ბიჭებს ამ გზაზე აყენებდე“, - განაცხადა ქევხიშვილმა.

ძიუდოს ფედერაციის პრეზიდენტმა აღნიშნა, რომ ამ პროცესების უკან რაღაც ჯგუფი დგას, თუმცა ამაზე დღეს საუბარი არ სურს. ქევხიშვილმა დაამატა, რომ მზადაა, სპორტსმენებს ნებისმიერ ფორმატში შეხვდეს, ოღონდ დახურულ კარს მიღმა. მან განმარტა, რომ რიგ საკითხებზე საუბარი საჯაროდ არ შეიძლება.

სასტუმრო „ბილტმორში“ ძიუდოს ფედერაციის რიგგარეშე ყრილობა გაიმართა. იმ ძიუდოისტთა ჯგუფი, რომელიც ითხოვს ქევხიშვილის გადადგომას, მცირე დაძაბულობის შემდეგ შეუშვეს შეხვედრაზე, თუმცა სპორტსმენებმა ყრილობა პროტესტის ნიშნად მალევე დატოვეს.