პოლიტიკა

ძალის არ გამოყენების ვალდებულების აღების აუცილებლობა არსებობს, ოღონდ რუსეთის მხრიდან - ქეთევან ციხელაშვილი

შერიგებისა და სამოქალაქო თანასწორობის საკითხებში სახელმწიფო მინისტრის ქეთევან ციხელაშვილის განცხადებით, ძალის არ გამოყენების ვალდებულების აღების აუცილებლობა არსებობს, ოღონდ რუსეთის მხრიდან, რომელსაც არ გაუმყარებია ცეცხლის შეწყვეტის შეთანხმებით აღებული ვალდებულებები, ამის შესახებ ციხელაშვილმა გრიგორი კარასინის მიერ გაკეთებული განცხადების კომენტირებისას აღნიშნა, რომლის მიხედვით, ამიერკავკასიაში ნატო-ს გააქტიურება საფრთხეს უქმნის როგორც რეგიონს მთლიანად, ისე აფხაზეთსა და სამხრეთ ოსეთს. კარასინი მიიჩენვს, რომ დადგა საჭიროება იმისა,რომ ძალის გამოუყენებლობის შესახებ შეთანხმება გაფორმდეს, ერთის მხრივ აფხაზეთსა და სამხრეთ ოსეთის მხრიდან და მეორეს მხრივ თბილისის მხრიდან.

„თუ ჩვენ ვსაუბრობთ დესტაბილიზაციის საფრთხესა და გამოწვევებზე სტაბილურობის თვალსაზრისით, ასეთ საფრთხეებს ქმნის, საუბედუროდ და სამწუხაროდ, განგრძობითი ოკუპაცია საქართველოს ტერიტორიების. რუსეთის სამხედრო შენაერთების მუდმივი ზრდა, სამხედროების განლაგება, შეიარაღების დიდი მოცულობა, რომელიც აფხაზეთისა და სამხრეთ ოსეთის ტერიტორიებზეა, სწორედ ეს არის მთავარი გამოწვევა უსაფრთხოებისათვის.

საქართველოს მისწრაფება ჩრდილოატლანტიკურ ალიანსში არ ქმნის საფრთხეს აბსოლუტურად არც ერთი აქტორისთვის, ეს არის საქართველოს დემოკრატიული რეფორმის და უსაფრთხოების უზრუნველყოფის გზა და ამაზე არაერთხელ გაგვიცხადებია ყველა ფორმატის ფარგლებში. რაც შეეხება ძალის არგამოყენების ვალდებულების აღების აუცილებლობას, ასეთი აუცილებლობა მართლაც არსებობს, ოღონდ არსებობს რუსეთის მხრიდან, რომელსაც არ გაუმყარებია ცეცხლის შეწყვეტის შეთანხმებით აღებული ვალდებულებები და რეალურად რუსეთი არის ის მხარე, რომელიც ფლობს ძალას და მან უნდა აიღოს ძალის გამოუყენებლობის ვალდებულება. სწორედ ეს არის ჟენევის საერთაშორისო დისკუსიების დღის წესრიგის ერთ ერთი მთავარი საკითხიც“,-განაცხადა ციხელაშვილმა.

მონიკა დავლიანიძე