პოლიტიკა

ძალიან შეშფოთებული ვართ იმ კადრებით, რაც გუშინ იყო, მოვუწოდებთ სიმშვიდისკენ - აშშ-ის ელჩის მოვალეობის შემსრულებელი

საქართველოში აშშ-ის ელჩის მოვალეობის შემსრულებელმა როს უილსონმა გუშინ, პრეზიდენტის ინაუგურაციის დღეს მომხდარ დაპირისპირებაზე საუბრისას განაცხადა, რომ აშშ მხარს უჭერს სიტყვისა და შეკრების თავისუფლებას, თუმცა ამ უფლებების განხორციელება წყნარად და მშვიდობიანად უნდა მოხდეს.

„რაც შეეხება გუშინ განვითარებულ მოვლენებს, აშშ, რა თქმა უნდა, მხარს უჭერს სიტყვისა და შეკრების თავისუფლებას. ჩვენ მხარს ვუჭერთ იმას, რომ ამ უფლებების განხორციელება მშვიდად და მშვიდობიანად მოხდეს. ჩვენ ძალიან შეშფოთებული ვართ იმ კადრებით, რაც გუშინ იყო. მოვუწოდებთ სიმშვიდისკენ. არჩევნების შემდეგ საქართველომ უნდა განაგრძოს წინსვლა და იმუშაოს მნიშვნელოვან საკითხებზე, როგორიც არის ქვეყნისა და მისი მომავლის გაძლიერება“, - განაცხადა უილსონმა.

გუშინ გურჯაანში, ველისციხესთან „ნაციონალური მოძრაობის“ აქციის მონაწილეები სამართალდამცველების მიერ გადაკეტილი გზის გახსნასა და თელავისკენ გადაადგილებას ცდილობდნენ, სადაც სალომე ზურაბიშვილის ინაუგურაცია იმართებოდა. პოლიციამ მათ ალტერნატიული გზა ყვარლის გავლით რამდენჯერმე შესთავაზა, რაზეც მომიტინგეებმა უარი განაცხადეს.

პოლიციასა და მომიტინგეთა შორის რამდენჯერმა მოხდა შეტაკება. აქციის მონაწილეებმა პოლიციის კორდონის ავტომობილების გარღვევა და პოლიციის ავტობუსის გადაბრუნება სცადეს, ასევე მომიტინგეთა ნაწილმა სამარტალდამცველთა ავტობუსს ქვები დაუშინა.

ინაუგურაციის შემდეგ, აქციის მონაწილეებმა თბილისში პარლამენტთან გადაინაცვლეს, სადაც კარვები გაშალეს.