პოლიტიკა

ძალიან შემაშფოთებლად გამოიყურება სიტუაცია, რადგან ვხედავთ ელიტური კორუფციის ნიშნებს ბიზნესსექტორში - ნინო ლომჯარია

სახალხო დამცველმა ნინო ლომჯარიამ ტელეკომპანია „იბერიას“ ირგვლივ მიმდინარე პროცესებზე საუბრისას განაცხადა, რომ მედიაში გავრცელებული აუდიოჩანაწერები მიუთითებს კორუფციაზე ბიზნესსექტორში.

მისივე თქმით, აღნიშნულ საკითხზე მნიშვნელოვანია პასუხების მოსმენა პროკურატურისგან, თუ რა ეტაპზეა გამოძიება.

„უპირველეს ყოვლისა, ეს ჩანაწერები საჭიროებს ექსპერტიზას, მათი ავთენტურობის დადგენას. ყოველდღე, როცა ახალ ჩანაწერს ვისმენთ, ძალიან შემაშფოთებლად გამოიყურება სიტუაცია, რადგან ვხედავთ ელიტური კორუფციის ნიშნებს ბიზნესსექტორში. ის, რასაც ვუყურებ, მე ვფიქრობ, საგანგაშოა, ამიტომ ალბათ, პასუხები უნდა მოვისმინოთ პროკურატურისგან, თუ რა ეტაპზეა გამოძიება, არის თუ რაიმე პროგრესი. რასაც ვუყურებთ, ეხება არა მარტო ერთ ტელეკომპანიას, არამედ მიანიშნებს, რომ ზოგადად ბიზნესში არსებობს სერიოზული პრობლემები კორუფციის თვალსაზრისით. ამიტომ ამას პასუხების გაცემა სჭირდება“, -თქვა ლომჯარიამ.

გუშინ რუსთავი 2-მა გამოაქვეყნა აუდიოჩანაწერი და ფოტომასალა, რომლებშიც ასახულია შეხვედრა, სადაც „ომეგა ჯგუფის“ წილებისა და თამბაქოს ბიზნესის გადანაწილებაზეა საუბარი.