პოლიტიკა

ძალიან მეეჭვება, რომ ის ასეთ საქმეებში იყოს ჩართული - მირიან წიკლაური ივანიშვილსა და „ომეგაზე“ გამოქვეყნებულ ახალ ჩანაწერებზე

საპარლამენტო ფრაქცია „ქართული ოცნება-სოციალ-დემოკრატების“ წევრმა, მირიან წიკლაურმა ეჭვი გამოთქვა იმასთან დაკავშირებით, რომ ყოფილ პრემიერ ბიძინა ივანიშვილს უშუალოდ მიეღო მონაწილეობა „ომეგას“ საქმეში.

„რამდენადაც მე ვიცნობ ბიძინა ივანიშვილს, ის ნაკლებად რომ ჩართული იყოს ასეთ საქმეებში. ეს პირადად ჩემი აზრია, ჩვენი ნაცნობობა ამის საფუძველს მაძლევს, რომ საკმაოდ კარგად ვიცნობდე მას, მის ხასიათს და ძალიან მეეჭვება, რომ ის ასეთ საქმეებში იყოს ჩართული“, -განაცხადა დეპუტატმა და აღნიშნა, რომ ლევან ყიფიანმა განმარტება მანამდე გააკეთა, რომ ესეთი ჩანაწერები ურთიერთშეთანხმებით იწერებოდა.

დეპუტატ რომან კაკულიას თქმით, ჩანაწერების სერიალი არჩევნების შემდეგ დასრულდება და სწორედ ამის შემდეგ გააკეთებს ის შეფასებას.

„თითოეული სერიის შემდეგ კომენტარის გაკეთებას მირჩევნია, მთელი ფილმი ვნახო, რომელიც, ჩემი აზრით, დასრულდება არჩევნების შემდეგ, რომ შემდეგ გავაკეთო საერთო დასკვნა. ყოველი სერიალის შემდეგ დასკვნას პრინციპში არ გავაკეთებ და მერე მთლიანობაში ფილმს რომ ვნახავ მერე გავაკეთოთ დასკვნა“,-განაცხადა კაკულიამ.

„ომეგა ჯგუფის“ საქმეზე ახალი ჩანაწერები გამოქვეყნდა. საუბარია ე.წ. სარდაფის ეპიზოდზე. უწყვეტ ჩანაწერში ლევან ყიფიანი ფარცხალაძესთან მის დაპირისპირებაზე დეტალურად საუბრობს. ჩანაწერებიდან ასევე ირკვევა, რომ კონფლიქტის გარჩევა თავის თავზე ბიძინა ივანიშვილმა აიღო.

გარდა ამისა, ივანიშვილთან ერთად ფარცხალაძე-ყიფიანს შორის დაპირისპირების მოგვარებაში ჩართულები იყვნენ გიორგი გახარია, დავით მაღრაძე და ბიზნესმენი გიორგი რამიშვილი, იგივე ზარალა.