პოლიტიკა

ძალიან დიდი იმედი მაქვს, რომ უკვე ივლისიდან პენსიონერები და შშმ პირები შეძლებენ, ნაკლებ ფასად შეიძინონ სასიცოცხლოდ მნიშვნელოვანი მედიკამენტები - დავით სერგეენკო

ჯანდაცვის მინისტრობის კანდიდატმა დავით სერგეენკომ იმედი გამოთქვა, რომ უკვე ივლისიდან პენსიონერებისთვის და შშმ პირებისთვის იქნება ხელმისაწვდომი, ნაკლებ ფასად შეიძინონ სასიცოცხლოდ მნიშვნელოვანი მედიკამენტები.

სერგეენკოს მტკიცებით, მედიკამენტებზე ხელმისაწვდომობა ჯანდაცვის ერთ-ერთ გამოწვევას წარმოადგენს.

„ერთ-ერთ ყველაზე უფრო მთავარ გამოწვევად გამოვყოფდი იმას, რომ მიუხედავად იმისა, რომ საყოველთაო ჯანდაცვის სახელმწიფო პროგრამამ მნიშვნელოვნად, ჯერადობით შეამცირა მოსახლეობის ჯიბიდან გადასახადები, ის ისევ მაღალი რჩება. თუ იყო 70 % საყოველთაო ჯანდაცვის დანერგვამდე, ახლა ეს არის 55 % და ამ ჯიბიდან გადასახადების 70%- ზე მეტს შეადგენს დანახარჯები მედიკამენტებზე.

თუ დაისმებოდა კითხვა, რომ რომელიმე ერთი გამოწვევა დამესახელებინა ჯანდაცვაში, აუცილებლად დავასახელებდი მედიკამენტებზე ხელმისაწვდომობას.

შარშან მაისიდან დავიწყეთ პირველი ეტაპი ამ მიმართულებით და ძალიან დიდი იმედი მაქვს, რომ უკვე ივლისის თვეშივე მოვასწრებთ მორიგ გაფართოებას, როდესაც ასაკით პენსიონერებს და შეზღუდული შესაძლებლობების მქონე პირებს გაუჩნდებათ შესაძლებლობა, მნიშვნელოვნად, ჯერადობით ნაკლებ ფასად შეძლონ სასიცოცხლოდ მნიშვნელოვანი მედიკამენტების შეძენა“, - განაცხადა სერგეენკომ განათლების, მეცნიერებისა და კულტურის, სპორტისა და ახალგაზრდულ საქმეთა და ჯანმრთელობის დაცვისა და სოციალურ საკითხთა საპარლამენტო კომიტეტების გაერთიანებული სხდომაზე, რომელზეც მთავრობის შემადგენლობისთვის და სამთავრობო პროგრამისთვის ნდობის გამოცხადების საკითხი განიხილება.