სამართალი

ძალიან ბევრი მოწმე იყო დაკითხული 2 დეკემბერს, მაგრამ გაქრა ჩვენებები - ზაზა სარალიძე

ხორავას ქუჩაზე მოკლული მოზარდის დავით სარალიძის მამამ - ზაზა სარალიძემ ღამე შინაგან საქმეთა სამინისტროს ეზოში გაათენა.

სარალიძე პროტესტს განაგრძობს და ამბობს, რომ მას მოთხოვნები არ შეუცვლია და მიხეილ კალანდიას დაკავებას მოითხოვს.

“მოთხოვნები არ შემიცვლია, მიხეილ კალანდიას დაკავებას ვითხოვ. იქიდან გამომდინარე, რომ საქმის მასალებში არის საკმარისი მტკიცებულებები, რომ პასუხისგებაში მიეცეს.

1 დეკემბერს იყო, თუ 2 დეკემბერს არ აქვს მნიშვნელობა, მაშინ იყო პასუხისგებაში მისაცემი მირზა სუბელიანი იმ ფაქტზე, რაზეც დღეს არის მიცემული პასუხისგებაში.

ძალიან ბევრი მოწმე იყო დაკითხული 2 დეკემბერს, მაგრამ გაქრა ჩვენებები,“- აცხადებს სარალიძე.

შსს-თან მთელი ღამის განმავლობაში იმყოფებოდა "სამართალდამცველთა რეფორმირების ცენტრის" ხელმძღვანელი ზვიად კუპრავა.

"მოთხოვნა არის დაისაჯოს ადამიანები ბრალეული ქმედებისთვის, რა დანაშაულიც მათ აქვთ ჩადენილი. იმედია ამ სამკვირიანმა ხელისუფლებამ რაღაც შინაარსი გამოიტანა წინა ხელისუფლების მხრიდან ამ მოთხოვნების იგნორისგან და ალბათ ხვდებიან ამ მოთხოვნების სერიოზულობას.

ზაზას შს სამინისტროში მაღალი თანამდებობის პირმა უთხრა, რომ კალანდიას არ დაიჭერენ. ამიტომ მიიღო ზაზამ ის გადაწყვეტილება, რაც მიიღო,"-აცხადებს კუპრავა.