პოლიტიკა

„ძალა ერთობაშია“ ახალქალაქის N 40 საოლქო საარჩევნო კომისიის თავმჯდომარეს ძალადობაში ადანაშაულებს

გაერთიანებული ოპოზიცია „ძალა ერთობაშია“ ახალქალაქის N 40 საოლქო საარჩევნო კომისიის თავმჯდომარეს, ჰასმიკ მარანგოზიანს მათი წარმომადგენლების მიმართ განხორციელებულ ფიზიკურ და სიტყვიერ ძალადობაში ადანაშაულებს.

როგორც „ერთიანი ნაციონალური მოძრაობის” პოლიტიკური საბჭოს წევრმა, ლევან ბეჟაშვილმა საგანგებო ბრიფინგზე განაცხადა, „ძალა ერთობაშია"-ს წარმომადგენლებს, თეონა ჭალიძეს და არტურ მკოიანს ჰასმიკ მარანგოზიანმა ფიზიკური და სიტყვიერი შეურაცხყოფა მიაყენა.

„ხელისუფლება რატომღაც ამ რეგიონს განიხილავს, რატომღაც თავის საარჩევნო ყულაბად, სადაც შეუძლია გაყალბების, ძალადობის, სპეცსამსახურების მეშვეობით თავისი საარჩევნო ყულაბა გაავსოს. ამიტომ, ჩვენი განსაკუთრებული ყურადღების და მიზანდასახულობის ობიექტი იქნება ახალქალაქის და ნინოწმინდის საოლქო საარჩევნო კომისია და სწორედ ამიტომ გავაგზავნეთ საოლქო საარჩევნო კომისიებში ისეთი პროფესიონალი ადამიანები, რომლებსაც აქვთ საარჩევნო გამოცდილება და რომლებიც წინ აღუდგებიან იმ დაგეგმილ გაყალბების ფაქტებს, რომელსაც ხელისუფლება აპირებს ჯავახეთის რეგიონში,“ - განაცხადა ბეჟაშვილმა.

გაერთიანებული ოპოზიციის წევრების თქმით, ჰასმიკ მარანგოზიანი, გამოირჩეოდა განსაკუთრებული აგრესიით.

თეონა ჭალიძის თქმით, ინციდენტის შემდეგ საპატრულო პოლიციას მიმართეს, რის შემდეგაც ახალქალაქის პოლიციაში გადაიყვანეს. იქ კი, ოპოზიციის წარმომადგენლის თქმით, სამცხე-ჯავახეთის პოლიციის დეპარტამენტის უფროსის მოადგილე, გივი სიხარულიძე დახვდათ, რომლის მხრიდანაც, ადგილი ჰქონდა კანონდარღვევის ფაქტებს.

„ძალა ერთობაშია"-ს წევრები მოითხოვენ აღნიშნულ ფაქტზე, გენერალური ინსპექციიდან და ცესკო-დან სასწრაფო რეაგირებას.