პოლიტიკა

დროებითი ზომის სახით გენდერული კვოტების შემოღება სწორი იქნება საქართველოსთვის - თამარ ჩუგოშვილი

პარლამენტის ვიცე-სპიკერის, თამარ ჩუგოშვილის შეფასებით, პოლიტიკაში ქალთა ჩართულობის გასაზრდელად უმჯობესია კვოტების შემოღება. ამის შესახებ მან ჟურნალისტებს განუცხადა ქალთა პოლიტიკური მონაწილეობის საკითხებზე მიმდინარე კონფერენციაზე - „საქართველო - თანაბარი მონაწილეობის მისაღწევად“. ამ ღონისძიების მიზანია საქართველოში ქალთა პოლიტიკური აქტიურობის გაზრდა.

„იმ ყველაფრის გათვალისწინებით, რომ საქართველოში ძალიან ნელა ხდება სტატისტიკის ცვლილება და ძალიან ნელა ხდება ქალების პოლიტიკურად გააქტიურება, ვფიქრობ, რომ დროებითი ზომის სახით კვოტების მიღება არის საქართველოსთვის სწორი ზომა. ესაა ის შესაძლებლობა და საშუალება, რომელიც დროის მოკლე პერიოდში დიდ პროგრესს მოგვიტანს ქალთა პოლიტიკური მონაწილეობის გაზრდის კუთხით“, -თქვა ჩუგოშვილმა.

კონფერენციაზე განიხილავენ 37 000 მოქალაქის ხელმოწეით შესულ ინიციატივას, რომელიც ითვალისწინებს სავალდებულო გენდერული კვოტების შემოღებას. ის გულისხმობს პარტიულ საარჩევნო სიებში 50%-იან ქალთა წარმომადგენლობას, თუმცა ის არ ეხება მაჟორიტარულ სისტემას.

ანა მებურიშვილი