სამართალი

დოდო გუგეშაშვილი არ გამორიცხავს, რომ მისი შვილის მკვლელი უკვე საზღვარგარეთ იმყოფება

დოდო გუგეშაშვილი არ გამორიცხავს, რომ მისი შვილის მკვლელი უკვე საზღვარგარეთ იმყოფება.

განცხადება გუგეშაშვილმა დღეს გამართულ პრესკონფერენციაზე გააკეთა.

გუგეშაშვილი ამბობს, რომ რამდენიმე თვის წინ მომხდარი თავდასხმის მოტივი კვალავაც უცნობია.

მისივე თქმით, მკვლელი, რომელსაც ის როგორც ჩანს, არარეალური სახელით იცნობდა, კვლავაც არ არის გამოძიების მიერ იდენტიფიცირებული.

ამასთან, მოკლულის დედა ფიქრობს, რომ მკვლელობა არ უნდა ყოფილიყო უცხო ქვეყნის სპეცსამსახურების მიერ შეკვეთილი.

„ვინაიდან არ არის იდენტიფიცირებული, არ ვიცით არის ქვეყანაში თუ არა. მაგრამ სრულიად გულწრფელად ვამბობ, ჩემთვის გადამწყვეტი მნიშვნელობა არანაირად არ არის მკვლელი და შემკვეთი, ჩვენ სამშობლოში არიან, თუ გასულები არიან. როდესაც იდენტიფიცირება მოხდება, მოხდება ისიც, რომ მათ ჩამოიყვანენ ინტერპოლის მეშვეობით,“-აცხადებს დოდო გუგეშაშვილი.

მისივე თქმით, ის სრულ ნდობას უცხადებს გამოძიებას.

,,იხილება ყველა შესაძლო ვერსია, გამოკითხულია ათასობით ადამიანი. სამწუხაროდ, ვერ მოხერხდა ზუსტი ფოტორობოტის შექმნა, ვინაიდან მე ვერ მივაწოდე მკვლელის ზუსტი გარეგნული აღწერილობა შსს-ს. ვერსიის დონეზეც არ ვიცი, ვის შეიძლებოდა დასჭირვებოდა ეს ტრაგედია, მხოლოდ ერთი შემიძლია დარწმუნებით ვთქვა, რომ მკვლელის სამიზნე ორივე ვიყავით, მეც და ჩემი ვაჟიც. სრულ ნდობას ვუცხადებ დღევანდელ ხელისუფლებას და მჯერა, რომ საქმე ძალიან მალე გამოძიებული იქნება”, – განუცხადა ჟურნალისტებს გუგეშაშვილმა.

ნინო ექვთიმიშვილი