მსოფლიო

დმიტრი მედვედევმა და კარენ კარაპეტიანმა სომხეთში არსებულ ვითარებაზე ისაუბრეს - სომხური მედია

რუსეთის პრემიერ-მინისტრ დმიტრი მედვედევსა და სომხეთის პრემიერ-მინისტრობის დროებითი მოვალეობის შემსრულებლის, კარენ კარაპეტიანს შორის სატელეფონო საუბარი შედგა, რომლის ინიციატორი რუსული მხარე იყო. ამის შესახებ სომხური მედია წერს.

„მხარეებმა განიხილეს საკითხები, რომლებიც უკავშირდება სომხურ-რუსულ ურთიერთობებს, სომხეთში არსებულ მოვლენებს. დმიტრი მედვედევმა მოძმე სომეხ ხალხს მხარდაჭერა გამოუცხადა და აღნიშნა საკონსტიტუციო სამართლის ფარგლებში სიტუაციის შენარჩუნების მნიშვნელობა“, - დაწერა News.am-მა.

ცნობისთვის, გუშინ სომხეთის პრემიერი, ექს-პრეზიდენტი სერჟ სარგსიანი თანამდებობიდან გადადგა.

2015 წელს განხორციელებული საკონსტიტუციო ცვლილებებით, სომხეთი საპრეზიდენტოდან საპარლამენტო მმართველობაზე გადავიდა და პრეზიდენტის ნაცვლად პრემიერ-მინისტრი გახდა ყველაზე დიდი ძალაუფლებით აღჭურვილი პირი. საპრეზიდენტო ვადის ამოწურვის შემდეგ მმართველმა გუნდმა სარგსიანის კანდიდატურა წარადგინა პრემიერ-მინისტრის თანამდებობაზე, რასაც პარლამენტმა მხარი დაუჭირა. მიუხედავად ამისა, სარგსიანის პრემიერობამ ერთი კვირაც არ გასტანა. წასვლის გადაწყვეტილება მან მასშტაბური საპროტესტო აქციების ფონზე მიიღო, რომლებიც მთელი ქვეყნის მასშტაბით მიმდინარეობდა. 11 დღის განმავლობაში ქუჩაში გამოსული მოქალაქეები სარგსიანის წასვლას ითხოვდნენ.

თანამდებობაზე დარჩენის შემთხვევაში სარსგიანი ხელისუფლებას 2022 წლამდე უხელმძღვანელებდა.