პოლიტიკა

ჯოხს მთლიანად ირაკლი კობახიძეზე არ გადავტეხდი - დავით უსუფაშვილი

საქართველოს ყოფილი თავმჯდომარე, მოძრაობა „შენების საქართველოს“ ლიდერი დავით უსუფაშვილი, საკონსტიტუციო ცვლილებებთან დაკავშირებულ პროცესში იგი ჯოხს მხოლოდ ირაკლი კობახიძეზე არ გადატეხდა.

როგორც უსუფაშვილმა „ტვ პირველის“ ეთერში განაცხადა, მიმდინარე პროცესებში იგი პრემიერ-მინისტრს ვერ ხედავს, რომელიც არის პოლიტიკური ლიდერი.

უსუფაშვილის შეფასებით, ირაკლი კობახიძემ მრავალი როლი მოირგო, იქნება ეს პოლიტიკური ლიდერის, ტექნიკური შემსრულებლის თუ სხვა.

„ამ პროცესებში ჯოხს მთლიანად ირაკლი კობახიძეზე არ გადავტეხდი. მე არ ვიცი, სად არის პრემიერ-მინისტრი,“ოცნების“ პოლიტიკური გუნდის ლიდერი, ვინც არის ამ ქვეყნის ლიდერი.

საზოგადოებასთან, პოლიტიკურ ძალებთან, საერთაშორისო ორგანიზაციებთან, პრეზიდენტთან კომუნიკაცია, კონსენსუსის მოძებნა, არის სწორედ ქვეყნის პოლიტიკური ლიდერის ამოცანა.

ირაკლი კობახიძეს დაეკისრა პოლიტიკური ლიდერის როლიც, ტექნიკური შემსრულებლის როლიც და არ ვიცი, ყველა როლი. რატო იტვირთა მან ეს ყველაფერი თუ მისი გატანის შანს ვერ ხედავდა, ეს სხვა საკითხია.

ახლა მაინც, როდესაც „ქართული ოცნების“ ლიდერები ვიზუალურად ხედავენ იმას რაც ხდება, თუ არსობრივად, არგუმენტებით ვერ გაიზიარეს რაშია საქმე და ვიზუალურად მიანც ხედავენ, იქნებ მიიღონ სწორი გადაწყვეტილება. და ეს სწორი გადაწყვეტილება არის - ორი წლის წინ თავად „ქართული ოცნების“ მიერ ინიციარებული საარჩევნო სისტემის პროექტის დამტკიცება, რომელსაც მაშინაც და დღესაც ყველა უჭერს მხარს“,-განაცხადა დავით უსუფაშვილმა.

მონიკა დავლიანიძე