პოლიტიკა

ჯერ კიდევ ველოდებით ვაშინგტონისა და თბილისისგან განმარტებებს, რა სახის საქმიანობას ეწევა ლუგარის ლაბორატორია - გრიგორი კარასინი

„ჯერ კიდევ ველოდებით ვაშინგტონისა და თბილისისგან განმარტებებს აღნიშნული ლაბორატორიის [ლუგარის სახელობის ლაბორატორიის] საქმიანობის ჭეშმარიტ ხასიათთან დაკავშირებით. არ დაგავიწყდეთ, გეოგრაფიულად ის პირდაპირ ჩვენს საზღვართანაა“, - ამის შესახებ რუსეთის საგარეო საქმეთა მინისტრის მოადგილემ გრიგორი კარასინმა საინფორმაციო სააგენტო „რია ნოვოსტისთვის“ მიცემულ ინტერვიუში განაცხადა.

კარასინის მტკიცებით, ამა წლის 14-15 ნოემბერს უცხოელი დამკვირვებლების მიერ ლუგარის ლაბორატორიაში განხორციელებულმა შეფასებითმა ვიზიტმა სიტაუციას არ მოჰფინა ნათელი.

„მიგვაჩნია, რომ მსგავსი სახის „ექსკურსიები“ ვერ იქნება ბიოლოგიური და ტოქსიკური იარაღის აკრძალვის კონვენციის ფარგლებში მექანიზმის ვერიფიკაციის ალტერნატივა“, - აღნიშნა კარასინმა.

ცნობისთვის, რუსეთის თავდაცვის სამინისტრომ 4 ოქტომბერს განაცხადა, რომ „აშშ ლუგარის ლაბორატორიაში საქართველოს მცხოვრებლებზე ექსპერიმენტებს ატარებს“. რუსული მხარის მტკიცებით, ტოქსიკური ნივთიერების გამოცდის გამო, 2015 წლის დეკემბერის შემდეგ ათობით ადამიანი დაიღუპა. ეს განცხადება რუსეთის შეიარაღებული ძალების რადიაციული, ქიმიური და ბიოლოგიური დაცვის ჯარების მეთაურმა იგორ კირილოვმა გააკეთა. თავდაპირველად ამ თემაზე პრესკონფერენცია მოსკოვში იგორ გიორგაძემ გამართა.

მომდევნო დღეს რუსეთის თავდაცვის სამინისტროს დაავადებათა კონტროლის ეროვნული ცენტრის ხელმძღვანელმა ამირან გამყრელიძემ უპასუხა. მისი განცხადებით, რუსეთი აგრძელებს უსაფუძვლო დეზინფორმაციის გავრცელებას რიჩარდ ლუგარის ცენტრის მუშაობასთან დაკავშირებით.