პოლიტიკა

„ჯაველინების“ სისტემა საქართველოში უსაფრთხო ადგილასაა განთავსებული - ლევან იზორია

საქართველოს თავდაცვის მინისტრის, ლევან იზორიას განცხადებით, საქართველოში უკვე ჩამოვიდა „ჯაველინის“ ტიპის სარაკეტო დანადგარები.

„ „ჯაველინების“ სისტემის შეძენის პირველი ეტაპი წარმატებით დასრულდა. საქართველოში „ჯაველინების“ სისტემა უსაფრთხო ადგილას არის განთავსებული“, - თქვა იზორიამ აშშ-ის ელჩთან, იან კელისთან შეხვედრის შემდეგ.

შეხვედრა თავდაცვის სამინისტროში გაიმართა.

საუბარი შეეხო ასევე სტრატეგიულ პარტნიორთან ერთად თავდაცვის სფეროში ორმხრივი თანამშრომლობის ფარგლებში განხორციელებულ პროექტებს - საქართველოს თავდაცვის მზადყოფნის პროგრამის ამოქმედებასა და მომავალი თანამშრომლობის პერსპექტივებს.

შეხვედრას თავდაცვის მინისტრის პირველი მოადგილე ლელა ჩიქოვანი, აშშ-ის თავდაცვის ატაშე, პოლკოვნიკი ჯეფრი ჰარტმანი, აშშ-ის საელჩოს წარმომადგენელი, ჯეიმს მორისი და თავდაცვის სფეროში თანამშრომლობის ოფისის (ODC) ხელმძღვანელი, ვიცე-პოლკოვნიკი ჯონ მეიერსი დაესწრნენ.

საქართველოსთვის ტანკსაწინააღმდეგო სარაკეტო კომპლექს „ჯაველინის“ მიყიდვას აშშ-ის სახელმწიფო დეპარტამენტმა მხარი დაუჭირა. საუბარია 410 რაკეტაზე, 72 დანადგარსა და სასწავლო მოდელებზე, რომელთა საერთო ღირებულება 75 მილიონი დოლარია.