პოლიტიკა

ჯაფარიძის განცხადება საზოგადოების შეცდომაში შეყვანის მცდელობაა - ევროპული საქართველო

ფრაქცია „ევროპული საქართველო“ ცესკოს მიერ „ახალი პოლიტიკური ცენტრ – გირჩის“ სარეფერენდუმო კითხვის კანაფის ლეგალიზების შესახებ დარეგისტრირებაზე უარის თქმის შესახებ განცხადებას ავრცელებს. როგორც წერილშია ნათქვამი, ზურაბ ჯაფარიძის განცხადება, რომ „ევროპული საქართველოს“ წევრებმა რეფერენდუმის ჩატარების წინააღმდეგ მისცეს ხმა, სიმართლეს არ შეესაბამება.

„მედიანიუსი“ „ევროპული საქართველოს“ განცხადებას სრულად გთავაზობთ:

„დღეს, ცენტრალური საარჩევნო კომისია განიხილავდა „ახალი პოლიტიკური ცენტრის – გირჩის“ მიერ წარმოდგენილ სარეფერენდუმო კითხვას „უჭერთ თუ არა მხარს ქვეყანაში კანაფისა და კანაფის პროდუქტების ლეგალიზაციას“ რეგისტრაციის საკითხს. საკითხის განხილვის შემდეგ ცესკომ უარი განაცხადა კითხვის რეგისტრაციაზე. აღნიშნულ კენჭისყრაზე სარეფერენდუმო კითხვის რეგისტრაციაზე უარის თქმის გადაწყვეტილებას მხარი არ დაუჭირა „მოძრაობა თავისუფლებისთვის-ევროპული საქართველო“ წარმომადგენელმა დავით გურგენიძემ და მასთან ერთად კიდევ სამმა წევრმა. შესაბამისად, „გირჩის“ თავმჯდომარის, ზურაბ ჯაფარიძის მიერ გავრცელებული ინფორმაცია, რომ კენჭისყრაზე პარტიამ „მოძრაობა თავისუფლებისთვის-ევროპული საქართველო“ რეფერენდუმის ჩატარების წინააღმდეგ მისცა ხმა, არ შეესაბამება რეალობას და საზოგადოების შეცდომაში შეყვანის მცდელობაა“, - წერია განცხადებაში.

ანა მებურიშვილი